भूकम्पले ध्वस्त भवनको भग्नावशेषबाट शिशुको ३० घण्टापछि जीवितै उद्धार

भूकम्पको भग्नावशेषमा मृत आमाबाट जन्मिएकी शिशुको ३० घण्टापछि जीवितै उद्धार गरिएको छ । न्यूयोर्क टाइम्सका अनुसार उत्तर पश्चिम सिरियामा सोमबार भूकम्पले ध्वस्त भएको भवनको भग्नावशेषमुनिबाट एक नवजात बालिकालाई उद्धारकर्ताहरूले बचाएका हुन्।

स्रोतका अनुसार भग्नावशेषमुनि फसेकी एक गर्भवती महिलाले नवजात शिशुलाई जन्म दिएकी थिइन। भूकम्पमा परी आमाको मृत्यु भए पनि नवजात शिशुलाई भने आमाको नाभीमा बाँधिएको अवस्थामा उद्धार गरिएको र उनको अवस्था नाजुक रहेको बीबीसीले जनाएको छ ।

नवजात शिशुका बुवा, चार दाजुभाइ र एक काकीले भूकम्पमा ज्यान गुमाएका छन् । शिशुलाई भग्नावशेषबाट निकालिएको कारूणिक दृश्य सामाजिक सञ्जालमा यतिबेला देख्न सकिन्छ । फुटेजले जिन्दायरिसमा भग्नावशेषबाट निकालिएपछि धुलोले ढाकिएको बच्चा बोकेको देखाइएको छ।

३४ वर्षीय खलील अल शमीले न्यूयोर्क टाइम्सलाई सिरियाको जिन्दायरिस सहरमा सोमबार आएको भूकम्पले आफ्नो भाइको घर ध्वस्त भएको बताए। पूरै भवन भग्नावशेषमा परिणत भएको छ ।

उनी आफ्नो भाइ र परिवारका अन्य सदस्यहरू खोज्न भग्नावशेष खन्ने क्रममा थिए। यसैबीच उनले आफ्नी भाउजुको नाभीसँग जोडिएको सुन्दर बालिका देखे । त्यसपछि उनीहरूले तुरुन्तै नाभी काटे । बच्ची रुन थालिन्, उनलाई बाहिर निकाले ।भग्नावशेष पूरै हटाउँदा बालिकाकी आमा मृत अवस्थामा फेला परेकी थिइन् । खलीलका अनुसार उनकी भाउजु गर्भवती थिइन् र एक–दुई दिनपछि बच्चा जन्माउने मिति थियो ।

भूकम्पपछिको झट्काका कारण भग्नावशेषमै बच्चा जन्माएकी हुन् । करिब ३० घण्टापछि बालिकालाई सकुशल बाहिर निकालियो ।समाचार संस्था एएफपीका अनुसार अहिले ती शिशुको अवस्था स्थिर रहेको छ । शरीरमा चोटका निशानहरू छन् । अत्यधिक चिसोका कारण उनलाई हाइपोथर्मिया पनि भएको छ ।