पर्यटकको बसाइ लम्ब्याउन चक्रीय पदमार्ग

कास्की । कास्कीको पर्यटकीय गाउँका रूपमा चिनिएको घान्द्रुक पुग्ने पर्यटकको बसाइ लम्ब्याउन चक्रीय पदमार्ग निर्माण गरिएको छ । अन्नपूर्ण गाउँपालिका– १० र ११ मा पर्ने उक्त पदमार्गको बिहीबार उद्घाटन गरिएको छ।

घान्द्रुक पर्यटन व्यवस्थापन समितिले निर्माण गरेको पदमार्गको गण्डकी प्रदेशको उद्योग, पर्यटन, वन तथा वातावरण मन्त्रालयका सचिव कुमानसिंह गुरुङले उद्घाटन गरे। चार किलोमिटर लामो पदमार्ग निर्माणका लागि मन्त्रालयले रु. पाँच लाख सहयोग गरेको सचिव गुरुङले जानकारी दिए।

बाँकी रु. एक लाख ५० हजार समितिले खर्च गरेको समितिका अध्यक्ष विक्रम गुरुङले बताए। उक्त पदमार्गको उद्घाटन भए पनि स्तरोन्नतिको काम अझै बाँकी रहेको छ।

मन्त्रालयका सचिव गुरुङले चक्रीय पदमार्गले घान्द्रुकको पर्यटन प्रवर्द्धनमा टेवा पुग्ने बताए। ‘घान्द्रुक कल्चर र नेचरको धनी गाउँ हो। यसमा निर्माण गरिएको चक्रीय पदमार्गले पर्यटन प्रवर्द्धनमा अझै टेवा पुग्नेछ,’ उनले भने, ‘प्रदेश सरकारले उच्च हिमाली क्षेत्रमा पदमार्ग निर्माणमा सघाउने योजना बनाएअनुसार नै यहाँ सहयोग गरेको हो।’

पदमार्गले दुईवटा मेश्रम बराह मन्दिर जोड्ने भएकाले प्राकृतिक र धार्मिक रूपमा महत्वपूर्ण रहेको सचिव गुरुङले सुनाए। पदमार्ग अझै अपूरो रहेकाले आगामी वर्षको बजेटमा यसको विस्तारका लागि सहयोग गर्ने उनले प्रतिबद्धता जनाए।

पदमार्ग घान्द्रुकको बसपार्कदेखि सुरु भएर पञ्चे, कोटगाउँ, बलाचे पार्क, नभ्री थेव मेश्रम बराह मन्दिर, कोचमा प्लाँ, सात सय घान्द्रुक मेश्रम बराह, नेगो, चिया बगान, गैह्री गाउँ, तल्लो गाउँ हुँदै बसपार्कमा पुगेर सकिने समितिका अध्यक्ष गुरुङले जानकारी दिए। पदमार्ग पूर्ण रूपमा सञ्चालनका लागि सरकारसँगै घान्द्रुकका होटेल व्यवसायीसँग पनि सहयोग माग्ने योजना रहेको उनले बताए।

‘यो पदमार्ग चार किलोमिटरको दूरीमा छ । पहिलो चरणको काम सकिएको छ । यसमा गर्न बाँकी अझै धेरै काम छ,’ समितिका अध्यक्ष गुरुङले भने, ‘यसका लागि सरकारसँग सहयोग लिने कुरा त छँदै छ, यहाँका होटेल व्यवसायीले पनि सहयोग गरे शिलालेख लेखेर राख्ने योजना छ।’

पदमार्ग निर्माणपछि एक दिन भए पनि पर्यटकको बसाइ लम्बिने स्थानीय अमृत गुरुङले बताए। पदमार्गको करिब दुई किलोमिटर क्षेत्रमा वनजंगल भएकाले पर्यटक प्रकृतिसँग रमाउने उनको भनाइ थियो।

‘पदमार्ग पर्यटकका लागि अति नै महत्वपूर्ण छ । यसले पर्यटकको बसाइ अवश्य लम्ब्याउँछ,’ अमृतले भने, ‘यसको आधा भागमा वनजंगल पर्छ । यहाँ पर्यटकले चराचुरुंगीको आवाजसँगै वन्यजन्तुहरू मृग, स्याल, वनकुखुरा अवलोकन गर्न सक्छन्।’ पदमार्गमा पर्यटकले चिया बगानसँगै फागुन–चैतमा लालीगुराँससँग रम्दै समय बिताउन सक्ने उनको भनाइ थियो।