शालिक तोडफोडको विरोध

महेन्द्रनगरमा रहेको सहिद भीमदत्त पन्तको शालिक तोडफोडको विरोध गर्दै सहिद भीमदत्त पन्त स्मृति प्रतिष्ठानका कार्यवाहक अध्यक्ष हरिप्रसाद जोशीले सहिद पन्तको शालिकमा तोडफोड गरी क्षति पुर्‍याउनेमाथि हदैसम्मको कारबाही हुनुपर्ने बताएका छन् ।

दलित, किसान, गरिबका नेता पन्तको शालिक तोडफोड गरी इतिहास मेटाउने परिपञ्च रचिएको उल्लेख गदै उनले त्यस्ता तत्व विरुद्ध एकजुट भएर उभिनुपर्ने बताए ।

प्रतिष्ठानका सचिव कर्णबहादुर चन्दले अमर सहिद पन्तले अनुसरण गरेको विचार अहिले पनि उत्तिकै सान्दर्भिक रहेको विचार व्यक्त गरे । शालिक तोडफोड गरेर सहिद पन्तको अपमान गरिएको उनले बताए ।

समाजका शोषक सामन्त विरुद्ध आन्दोलन गरी निमुखाको अधिकार स्थापित गर्ने कार्यमा संलग्न सहिद पन्त सच्चा क्रान्तिकारी भएको उनले चर्चा गरे । सहिद पन्तकै पथमा अगाडि बढ्दै अहिले लोकतान्त्रिक गणतन्त्रसम्म आइपुगेको उनको भनाइ छ ।

भीमदत्त नगरपालिकाका प्रवक्ता महेन्द्र खड्काले तोडफोड गरिएको शालिक पुनःनिर्माणको कार्य चाँडै अगाडि बढाइने बताए । शोषक सामन्तलाई परास्त गर्ने क्रान्तिकारी नेता पन्त इतिहासको पानामा सधैँ अमर रहिरहने उनले बताए ।

नेकपा एमाले सुदूरपश्चिम प्रदेश समिति उपसचिव नरबहादुर विकले श्रमजीवी, सर्वहारा वर्ग, किसान र निमुखाको आवाजका रुपमा रहेका नेताका विचार शालिक तोडिदैमा मेटिएर नजाने बताए ।

सहित पन्त वि.सं १९८३ मङ्सिर १० गते डडेल्धुराको कारीगाउँमा जन्मनुभएको हो । सुदूरपश्चिममा तत्कालीन व्यवस्थाविरुद्ध उनले ‘कि त जोत हलो, कित छोड थलो, यदि हैन भने अब छैन भलो’ भन्ने नाराका साथ जोताहा किसानको पक्षमा क्रान्ति गरेका थिए । तत्कालीन सरकारले उनलाई  वि.सं २०१० साउन १७ गते डोटीको बुडरमा हत्या गरेको थियो ।

उनको टाउकोलाई काटेर डडेल्धुरा खलङ्गाको टुँडिखेलमा केही दिन झुण्ड्याइएको थियो । भीमदत्त पन्तको सम्मान गर्दै सरकारले २०७२ फागुन १९ गते सहिद घोषणा गरेको थियो । सहिद पन्तले किसान क्रान्ति सुरु गरेका जिल्लाको ब्रम्हदेव, बेलौरी र महेन्द्रनगरमा शालिक रहेको छ ।

श्रोत: आइएनएस-स्वतन्त्र समाचार