आइतबार, वैशाख २३, २०८१

टुंगियाे ईपीएस विवाद, आवेदन दिने सबैलाई परीक्षा दिलाउन कोरिया तयार

नेपालखोज २०८० पुष २३ गते १८:२३

काठमाडौं । कोरिया भाषा परीक्षालाई लिएर उत्पन्न भएको विवादको समाधान भएको छ । वैदेशिक रोजगार विभागका महानिर्देशक डण्डुराज घिमिरेले कोरियाली पक्षसँग लगातार गरेको पहल सफल भएको हो ।

नेपाली युवाको माग र अदालतको आदेश बमोजिम इपीएसका लागि आवेदन गर्ने सबै परीक्षार्थीले परीक्षा दिन पाउने भएका छन् । भाषा परीक्षा लिने कोरियाको मानव संसाधन विकास सेवा (एचआरडी) का निमित्त प्रमुखसँग आज महानिर्देशक घिमिरेले यस सम्वन्धमा वैठक राखेका थिए । उक्त वैठकमा सहमति जुटेको छ ।

सबै परीक्षार्थीहरुलाई तीनवटा लटमा विभाजन गरेर परीक्षा दिन लगाउने सहमति भएको घिमिरेले नेपाल प्रेससँग बताए । जसअनुसार पहिलो लटमा आउँदो जनवरी २० मा ४७ हजारजनाको परीक्षा लिइने छ । दोस्रो लटमा ८० हजार र तेस्रो लटमा बाँकी ३७ हजार गरी एक लाख ६४ हजारले परीक्षा दिन पाउने भएको घिमिरेले जानकारी दिए । दोस्रो र तेस्रो लटको परीक्षाको मिति तय भइसकेको छैन ।

कोरियाले यसअघि कृषि तथा उत्पादनमूलक क्षेत्रका लागि परीक्षा लिने गरेकोमा यसपाली सिप बिल्डिङ परीक्षा पनि लिएको थियो । इपीएस कार्यालय नेपालले सुरुमै सीपबिल्डिङ परीक्षा दिनेले यसै वर्ष हुने अर्को इपीएस परीक्षामा सामेल हुन नपाउने सूचना निकाल्यो । त्यसको विरोधमा सीप बिल्डिङमा फेल भएका युवाहरुले आन्दोलत बनेका थिए ।

उच्च अदालत पाटनले सबै परीक्षार्थीले परीक्षा दिन पाउने आदेश गरेको थियो । तर, नेपालको अदालतको आदेश कोरियाले मान्छ वा मान्दैन भन्ने अन्योल थियो । यद्यपि, ईपीएस कार्यालयले सबै परीक्षार्थीको आवेदन स्वीकार गरिसकेको छ ।

महानिर्देशक घिमिरेले यस सम्वन्धमा कोरियाली दूतावाससँग लगातार पहल गरिरहेका थिए । यसअघि कोरियाली राजदूतसँग श्रम सचिवको पनि वार्ता भएको थियो ।

प्रतिक्रिया