एमालेले पार्टीको निर्णायक राष्ट्रिय शक्तिको वार्षिक कार्य योजना पारित गरेको छ

काठमाडाैं । नेकपा एमालेले पार्टीको निर्णायक राष्ट्रिय शक्तिको वार्षिक कार्य योजना पारित गरेको छ । 

एमाले पार्टी कार्यालय च्यासलमा शुक्रबार बसेको सचिवालय बैठकले पार्टीलाई बलियो र निर्णायक राष्ट्रिय शक्तिका स्थापित गर्ने गरी तयार गरिएको वार्षिक कार्य योजना पारित गरेको महासचिव शङ्कर पोखरेलले जानकारी दिए ।

बलियो राष्ट्रिय शक्ति निर्माणको वार्षिक कार्य योजनामा १८ वटा विषय समेटिएको उनले बताए । नियमित अधिवेशन आयोजना र व्यवस्थापन गर्ने, अरू पार्टीबाट प्रवेश गरेका तथा अधिवेशनहरूमा पराजित भएका नेता कार्यकर्तालाई ३ महिनाभित्र यथोचित जिम्मेवारी दिइसक्ने, कार्यकर्ताको कामको मूल्याङ्कन गर्ने विधि बसाल्ने लगायतका विषय कार्य योजनामा रहेको उनले बताए ।

त्यस्तै महासचिव पोखरेलले पार्टी कमिटी परिचालन र अन्तरविरोध व्यवस्थापनको प्रणाली बसाउने, पार्टी स्कूल सञ्चालनलाई अभियानको रूपमा चलाउने सरकार र जनप्रतिनिधिको कामलाई प्रभावकारी बनाउने, कामका नयाँ क्षेत्र पहिचान गर्ने लगायतका कार्य योजना रहेको जानकारी दिए । महासचिव पोखरेलले उपसभामुखमा विषयमा बाहिर चर्चामा आएजस्तो के गर्ने भन्ने निष्कर्षमा नपुगे पनि घटनाक्रमलाई हेर्दा उपसभामुख पदमा बस्न नमिल्ने धारणा राखे । 

त्यस्तै सचिवालय बैठकले भारतीय कम्युनिस्ट पार्टी (मार्क्सवादी) महासचिव सीताराम येचुरीको अन्तिम बिदाईका लागि पार्टीको तर्फबाट वरिष्ठ उपाध्यक्ष ईश्वर पोखरेललाई नयाँ दिल्ली पठाउने निर्णय गरेको महासचिव पोखरेलले जानकारी दिए ।