भारतको हिमपहिरो स्थलमा उद्धार कार्य तेस्रो दिनमा प्रवेश

काठमाडाैं । भारतीय उद्धारकर्ता आइतबार शून्यभन्दा तल तापक्रममा हिमपहिरोद्वारा पुरिएका मानिएका चार हराइरहेका कामदारलाई खन्न हतारिएका छन् । त्यहाँ हिमपातले अझै बढी हिउँ खस्ने जोखिम बढाइरहेको छ ।

अधिकारीका अनुसार शुक्रबार उत्तराखण्ड राज्यको तिब्बतसँगको सीमा नजिकै एक निर्माण शिविरमा हिमपहिरो गएपछि ५० भन्दा बढी कामदार हिउँ र भग्नावशेषमा पुरिएका थिए ।

राहत टोली ५० कामदारलाई उद्धार गर्न सफल भएको छ तर तिनीमध्ये चार जनाको पछि चोटका कारण मृत्यु भएको छ ।

राज्य अधिकारीले शनिबार रातिदेखि हिमपहिरोपछि हराइरहेका मानिसको सङ्ख्या पाँचबाट घटाएर चार गरेका छन् । पहिले पुरिएको विश्वास गरिएका एक कामदार सुरक्षित रूपमा घर फर्किएको पाइएको छ ।

उक्त व्यक्ति शुक्रबारको हिमपहिरोमा पुरिएका थिए कि थिएनन् भनेर अधिकारीले विवरण प्रदान गरेनन् वा भनेनन् ।

राज्य प्रकोप राहत टोलीले हिमपहिरोको समयमा कामदार बसिरहेका सबै स्टिल कन्टेनर फेला परेको तर त्यहाँभित्र कोही पनि नभएको बताएको छ ।

उद्धारकर्ताले आफ्नो प्रयासमा सैनिक हेलिकप्टर, ड्रोन र खोज कुकुर प्रयोग गरेका छन् र सैनिकले हराइरहेका मानिएका चार कामदार पत्ता लगाउन भूमि प्रवेश गर्ने राडार प्रयोग गर्ने तयारी गरिरहेका छन् ।

राज्यका मुख्यमन्त्री पुष्कर सिंह धामीले निरन्तर हिमपातका कारण उच्च जोखिम क्षेत्रबाट अन्य कामदारलाई सुरक्षित स्थानमा सार्न अधिकारीलाई निर्देशन दिएकाे टाइम्स अफ इन्डिया अखबारले आइतबार बताएको छ ।

हिमपहिरो गएको क्षेत्रमा तीन हजार २०० मिटरभन्दा बढी उचाइमा न्यूनतम तापक्रम माइनस १२ डिग्री सेल्सियससम्म पुगेको थियो ।

हिमालयको माथिल्लो भागमा विशेष गरी हिउँदको मौसममा हिमपहिरो र पहिरो सामान्य हुन् ।

वैज्ञानिकले जलवायु परिवर्तनले मौसमका घटनालाई अझ गम्भीर बनाइरहेको बताएका छन् भने नाजुक हिमाली क्षेत्रमा विकासको बढ्दो गतिले पनि वनविनाश र निर्माणको परिणामको बारेमा चिन्ता बढाएको छ ।

सन् २०२१ मा उत्तराखण्डमा एउटा ठूलो हिमनदीको भाग नदीमा खसेपछि आएको बाढीका कारण लगभग एक सय जनाको मृत्यु भएको थियो ।

साथै सन् २०१३ को विनाशकारी मनसुनी बाढी र पहिरोमा छ हजार मानिसको मृत्यु भएको थियो र यसले राज्यमा विकास परियोजनाको समीक्षा गर्न आह्वान गराएको थियो ।