श्रीलङ्काले चौध हजार भन्दा बढी सार्वजनिक सुरक्षा समिति स्थापना गर्ने

कोलम्बो रासस/सिन्ह्वा । श्रीलङ्काका कार्यवाहक प्रहरी महानिरीक्षक प्रियन्थ वेरसूरियाले देशभर चौध हजार भन्दा बढी सार्वजनिक सुरक्षा समिति स्थापना गर्ने निर्देशिका जारी गरेका छन् । यो पहल श्रीलङ्का प्रहरीले मिडियामा पठाएको सर्कुलरमार्फत जानकारी गराइएको छ ।

सर्कुलर अनुसार, यी समितिहरू देशभरका सबै ग्राम निलाधारी (सामान्य प्रशासनिक इकाइयाँ) स्तरमा स्थापना गरिनेछन् । समितिहरूको प्रमुख उद्देश्य प्रहरी र समुदाय बीचको सम्बन्धलाई सुदृढ गर्नु, शान्ति र सुरक्षा कायम राख्नु, अपराध र मादक पदार्थसँग सम्बन्धित समस्याहरूको समाधान गर्नु र धार्मिक सद्भावको प्रवद्र्धन गर्नु हो । कुल एक हजार ४२२ समितिहरू स्थापनाका लागि योजना बनाइएको छ ।

प्रत्येक समितिमा एक प्रहरी अधिकारी सदस्यको रूपमा कार्यरत हुनेछन् । यसका साथै अवकाश प्राप्त सार्वजनिक सेवक, पूर्व प्रहरी र सैनिक अधिकारी र युवा प्रतिनिधिहरू पनि समितिमा सदस्यको रूपमा सामेल हुनेछन् । सदस्यहरूले तीन वर्षको कार्यकाल पूरा गर्नेछन् ।

समितिहरूको प्रगति मासिक रूपमा स्थानीय प्रहरी चौकी प्रमुखद्वारा समीक्षा गरिने र जिल्ला स्तरमा सहायक प्रहरी उपाधीक्षकद्वारा प्रत्येक दुई महिनामा समितिको मूल्याङ्कन गरिनेछ । यस पहलले श्रीलङ्कामा सार्वजनिक सुरक्षा र शान्ति कायम राख्न महत्त्वपूर्ण भूमिका निर्वाह गर्ने अपेक्षासहित, प्रहरी र समुदाय बीचको विश्वास र सहकार्यलाई सुदृढ गर्ने प्रयास हुनेछ ।