युक्रेनबारे सम्झौतामा पुग्न तयार छौँ : रुसी विदेशमन्त्री लाभरोभ

वासिङ्टन । रुसका विदेशमन्त्री सर्गेई लाभरोभले बिहीबार मस्को युक्रेनमा युद्धबारे सम्झौता गर्न तयार रहेको बताएका छन् । महिनौँसम्म किएभमाथि भएको सबैभन्दा घातक आक्रमणपछि एक दुर्लभ आलोचना गर्दै अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनलाई आक्रमण रोक्न आग्रह गरेपछि रुसी विदेशमन्त्रीको यस्तो भनाइ आएको हो ।

हामी सम्झौतामा पुग्न तयार छौँ, तर अझै केही विशिष्ट विन्दुहरू छन्… जसलाई राम्रोसँग सुधार गर्न आवश्यक छ र हामी यसमा व्यस्त छौँ, लाभरोभले सिबिएस न्युजसँगको अन्तर्वार्तामा भने । ट्रम्पका दूत स्टिभ विटकफ शुक्रबार रुस जाँदैछन् । त्यहाँ उनले पुटिनसँग युद्धविराम वार्ताको अर्को चरण गर्ने अपेक्षा गरिएको छ ।

लाभरोभले वार्ता प्रक्रिया सही दिशामा अघि बढिरहेको र वासिङ्टनसँग वार्ता जारी रहने बताए । उनले अमेरिकी राष्ट्रपति ‘सम्भवतः पृथ्वीमा एक मात्र नेता हुन् जसले यस परिस्थितिको मूल कारणहरूलाई सम्बोधन गर्नुपर्ने आवश्यकता स्वीकार गरे’ तर ट्रम्पले ‘सम्झौताका तत्वहरू उल्लेख गरेन’ भने ।

तर बिहीबार बिहान युक्रेनको राजधानीमा क्षेप्यास्त्र र ड्रोन हमलामा कम्तीमा १२ जनाको मृत्यु भएपछि ट्रम्पले रुसी राष्ट्रपति पुटिनलाई प्रत्यक्ष अपिल गरे । रक्तपातको द्रुत अन्त्यका लागि ट्रम्पको दबाबलाई बेवास्ता गर्दै दर्जनौँ सर्वसाधारणको ज्यान लिएको रुसी हवाई आक्रमणको लहरमा यो पछिल्लो थियो ।

रुसी आक्रमणबाट म खुसी छैन, सामाजिक सञ्जालमा ट्रम्पले भने, आवश्यक छैन र धेरै खराब समय । भ्लादिमिर, रोक्नुहोस ! रुसको पक्षमा रहेको आरोप लगाइएका र युक्रेनी राष्ट्रपति भोलोदिमर जेलेन्स्कीलाई बारम्बार निन्दा गरेका ट्रम्पलाई पत्रकारहरूले युद्धको अन्त्यका लागि वार्तामा मस्कोले के के छुट दिएको थियो भनेर सोधेका थिए ।