करीव १ लाख ७० हजार बढी विपद् सूचक समुह गठन गर्दै सशस्त्र प्रहरी

काठमाडौं । सशस्त्र प्रहरी बलले विपद् व्यवस्थापनमा स्थानीय समुदायको समेत महत्वपूर्ण भूमिका हुने भएकोले देशभरी करीव १ लाख ७० हजार विपद् सूचकको व्यवस्था गर्न लागेको छ । समुदायस्तरमा विपद् सम्बन्धि सूचना प्राप्तीमा सहकार्य, परिचालनमा सहजीकरण र उद्धारमा समन्वयात्मक रुपमा कार्य गर्ने उद्देश्यले विपद् सूचकको व्यवस्था गर्न लागेको छ ।

यसका लागि सबै बाहिनी मुख्यालयले जेठ मसान्तसम्म आफ्नो जिम्मेवारी क्षेत्रमा पर्ने सबै वडाहरुमा २५ जनाको दरले विपद् सूचक समुह निर्माण गर्नुपर्ने हुन्छ । जस अनुसार देशभरीका ६ हजार ७ सय ४५ वडामा २५ जनाको दरले १ लाख ६८ हजार ५ सय ७५ जना विपद् सूचक तयार गरिनेछ ।

यसबाट विपद् सम्बन्धि सूचना तत्काल प्राप्त हुने र सोही अनुसार आफ्ना सुरक्षाकर्र्मी परिचालन र उद्वारमा सहजता हुने विश्वास मुख्यालयको छ । विपद् सुचक समुह तयार भएपछि उनीहरुलाई विपद् सचेतनामूकल प्रशिक्षण प्रदान गर्ने विपद् सिमुलेशन अभ्यासमा सहभागि गराउने योजना समेत सशस्त्र प्रहरी बलको छ ।

यसैबीच सशस्त्र प्रहरी बलले समुदायमा विपद् उद्वारक पनि तयार गर्दै छ । गत जेठ ७ गते सशस्त्र प्रहरी बल विपद् व्यवस्थापन तालिम शिक्षालय कुरिनटारमा संचालित गोताखोर तालिम समापनको अवसरमा सशस्त्र प्रहरी महानिरीक्षक राजु अर्यालले यसैवर्ष सातवटै प्रदेशमा करीव १ हजार समुदाय विपद् उद्वारक तयार गर्ने योजना सार्वजनिक गरेका हुन ।

जसअनुसार मुख्यालयले यसको तयारी स्वरुप मातहत कार्यालयमा विपद् उद्वारक स्वयंसेवक तालिम पनि शुरुवात गरेको छ । समुदाय विपद् स्वयंसेवक उत्पादनका लागि १८ दिनको तालिम दिईनेछ । त्यसमा सशस्त्र प्रहरी बलको विपद् व्यवस्थापन तालिम प्राप्त दक्ष सुरक्षाकर्मीले तालिम प्रदान गर्नेछन ।

प्रदेशस्थित सशस्त्र प्रहरी बलका मुख्यालय तथा राष्ट्रिय सशस्त्र प्रहरी बल प्रशिक्षण प्रतिष्ठानले यसै आर्थिक वर्षमा सम्पन्न हुने गरी तत्काल १८ वटा तालिम संचालन गर्नेछन् भने अन्य १ सय ४७ वटा तालिम आर्थिक वर्ष २०८२ / ०८३ मा संचालन गरिनेछ । यस प्रकारका तालिमले समुदायस्तरमा विपद्बाट बच्न पूर्व तयारीका साथै विपद्का समयमा उद्वार तथा राहतको कार्यमा सहजता समेत हुनेछ ।

सशस्त्र प्रहरी बल नेपाल नं। २३ मनकामना गण तनहुँबाट समुदाय विपद् स्वयंसेवक तालिम शुरुवात भएको छ । स्थानीय सरकार तथा सरोकारवाला निकायहरु सँगको समन्वयमा गणले ५८ जनाको लागि तालिम संचालन गरेको हो । तालिमको क्रममा स्थानीय पालिकामा रहेका र अपुग भएमा सशस्त्र प्रहरी बलको सम्बन्धित कार्यालयमा रहेका विपद् उद्वारका सामाग्री प्रयोग गरिनेछ । तालिमका लागि दक्ष प्रशिक्षकको व्यवस्था प्रशिक्षण प्रतिष्ठान तथा बाहिनी मुख्यालयहरुले गर्नेछन् भने प्राकृतीक विपद् जोखिम रहेका पालिकाहरुमा यसप्रकारको तालिम दोहो¥याएर समेत गरिने सशस्त्र प्रहरी बलको योजना छ ।