गाजामा शत्रुताबीच नयाँ विस्थापन आदेशबाट संयुक्त राष्ट्रसङ्घका प्रमुख चिन्तित

संयुक्त राष्ट्रसङ्घ । उत्तरी गाजा पट्टीका लागि जारी इजरायली नयाँ निकासी आदेशको निन्दा गर्दै संयुक्त राष्ट्रसङ्घका महासचिव एन्टोनियो गुटेरेसले पछिल्लो इजरायली आक्रमणबाट ज्यान गुमाएकोप्रति चिन्ता व्यक्त गरेका छन् । नागरिकहरूलाई सम्मान र संरक्षण गरिनुपर्छ, गुटेरेसका प्रमुख प्रवक्ता स्टेफन डुजारिकले भने ।

सबै बन्धकहरूको तत्काल, बिना शर्त रिहाइको आह्वान गर्दै डुजारिकले भने, महासचिवले मध्यस्थकर्ताहरूको निरन्तर प्रयासलाई पनि स्वागत गर्दै गाजामा स्थायी युद्धविराममा पुग्न आफ्नो अपिल दोहोर्‍याएका छन् । प्यालेस्टिनी चिकित्सा र सुरक्षा स्रोतहरूले सोमबार गाजा सहरको समुद्र तटमा रहेको क्याफेमा इजरायली हवाई आक्रमण हुँदा कम्तीमा २१ जनाको मृत्यु भएको र दर्जनौँ घाइते भएको बताएका छन् । आक्रमणपछि अस्पतालमा ल्याइएका अधिकांश पीडित महिला र बालबालिका रहेको अल–सिफाले एक संक्षिप्त विज्ञप्तिमा जनाएको छ ।

मानवीय मामिला समन्वयका लागि संयुक्त राष्ट्रसङ्घको कार्यालय (ओसिएचए) ले गाजाको अधिकांश भाग विस्थापनको आदेशमा रहेको बताएको छ । कब्जा गर्ने शक्तिका रूपमा इजरायलले नागरिकहरू जहाँ भए पनि र जहाँ गए पनि उनीहरूको सुरक्षा सुनिश्चित गर्नुपर्ने ओसिएचएले बताएको छ । मानिसहरूलाई भीडभाड भएको क्षेत्रमा धकेलिएको छ, जहाँ हजारौँ अन्य पहिले नै बसिरहेका छन्, ओसिएचएले आइतबारको विस्थापन आदेशबारे भनेको छ, यी ठाउँमा आश्रय, पानी र ढल प्रणाली र चिकित्सा सुविधाहरूको अभाव छ ।

कार्यालयका अनुसार सप्ताहन्तमा चलिरहेको इजरायली सैन्य कारबाहीको बीचमा खानाको पर्खाइमा समेत धेरै मानिस मारिए र घाइते भएका छन् । मध्य गाजाका लागि सप्ताहन्तमा पहिलेको विस्थापन आदेशपछि इजरायलीहरूले जबल्या र गाजा सहरका क्षेत्रका गाजाबासीहरूलाई अल मवासी जान निर्देशन दिएको मानवतावादीहरूले बताएका छन् ।

आइतबारको आदेशबाट मात्रै विस्थापित हुने क्षेत्रमा दर्जनौँ अस्थायी विस्थापन स्थलहरूमा बसोबास गर्ने परिवारहरूसहित लगभग एक लाख ५० हजार मानिस थिए । ओसिएचएले गाजाभरि आपूर्ति ल्याउन र मानवीय कार्यहरू गर्नमा भारी अवरोधहरूबीच मानिसहरू भोकै रहेको बताएको छ ।

विश्व खाद्य कार्यक्रम (डब्लुएफपी) का अनुसार पाँचमध्ये एक जना मानिसले विनाशकारी भोकमरीको सामना गरिरहेको र ९० हजारभन्दा बढी महिला र बालबालिकालाई कुपोषणका लागि तत्काल उपचार आवश्यक छ । डब्लुएफपीले यस क्षेत्रमा एक लाख ३० हजार मेट्रिक टन खाना राखिएको र पहुँच प्रदान गरिएमा गाजामा मानिसहरूलाई सेवा दिन तयार रहेका बताएको छ ।