पाकिस्तानमा मनसुनी वर्षाले ठूलो क्षति : दुई सय २१ जनाको मृत्यु, पाँच सयभन्दा बढी घाइते

काठमाडौं । पाकिस्तानमा यस वर्षको मनसुन वर्षाले ठूलो जनधनको क्षति पुर्‍याएको छ। राष्ट्रिय विपद् व्यवस्थापन प्राधिकरणले सार्वजनिक गरेको पछिल्लो प्रतिवेदनअनुसार, गत जुन २६ देखि जुलाई २१ सम्मको अवधिमा देशभर भएको अविरल वर्षा, बाढी र अन्य घटनाका कारण २२१ जनाले ज्यान गुमाएका छन् भने ५०२ जनाभन्दा बढी घाइते भएका छन् । पछिल्लो २४ घण्टामा मात्रै ५ जनाको मृत्यु र १० जना घाइते भएको तथ्याङ्कले विपत्तिको गम्भीरता देखाउँछ।

मनसुनबाट सबैभन्दा बढी प्रभावित पूर्वी पञ्जाब प्रान्त बनेको छ, जहाँ १३५ जनाको मृत्यु र ४७० जनाभन्दा बढी घाइते भएका छन् । यसबाहेक, उत्तरपश्चिमी खैबर पख्तुनख्वा मा ४६ जना, दक्षिणी सिन्ध मा २२ जना, बलुचिस्तान मा १६ जना, र पाकिस्तान नियन्त्रित कश्मीर मा १ जनाको मृत्यु भएको छ । गिलगिट–बल्तिस्तान क्षेत्रमा भने कुनै मृत्यु भएको छैन, तर ३ जना घाइते भएका छन्। राजधानी इस्लामाबादमा पनि एक बालक घाइते भएको खबर छ ।

वर्षा अझै जारी रहेकाले अधिकारीहरूले सम्भावित जोखिमका क्षेत्रहरूमा उच्च सतर्कता अपनाइरहेका छन्। बाढीको चेतावनी जारी गरिएको छ र राहत तथा उद्धार कार्यका लागि प्रान्तीय सरकारहरूसँगको समन्वयमा प्रभावित क्षेत्रमा निगरानी र सहायता कार्य जारी रहेको छ ।