गाजामा प्रहरी अधिकारीलाई तालिम दिन इयू इच्छुक

ब्रसेल्स, बेल्जियम । युरोपेली सङ्घले गाजा पट्टीमा तीन हजार प्यालेस्टिनी प्रहरी अधिकारीलाई वेस्ट बैङ्कमा तालिम दिन चाहेको युरोपेली सङ्घका एक अधिकारीले बुधबार बताएका छन्। यो पहिले नै सञ्चालन भइरहेको योजना हो । ‘यदि हालको युद्धविराम कायम रह्यो भने गाजालाई ‘महत्त्वपूर्ण प्रहरी बलको साथ स्थिर गर्न आवश्यक छ’, ती अधिकारीले भने ।

उनले संवेदनशील विषयमा बोल्ने अख्तियार आफूलाई नरहेको भन्दै नाम गोप्य राख्ने सहमतिमा उक्त कुराको खुलासा गरेका हुन् । संयुक्त राष्ट्रसङ्घको सुरक्षा परिषद्ले सोमबार अक्टोबर १० देखि इजरायल र हमासबीचको युद्धविराम गर्न अनुमति दिएको गाजा पट्टीका लागि अमेरिकी राष्ट्रपति डोनाल्ड ट्रम्पको योजनालाई बल दिने अमेरिकी मस्यौदा प्रस्तावको पक्षमा मतदान गरेको छ ।

शान्ति योजनाले विशेष गरी एक अन्तर्राष्ट्रिय बल सिर्जना गर्न अनुमति दिन्छ, जसले इजरायल, इजिप्ट र नयाँ प्रशिक्षित प्यालेस्टाइनी प्रहरीसँग मिलेर सीमा क्षेत्रहरू सुरक्षित गर्न र गाजालाई असैन्यीकरण गर्न मद्दत गर्ने कल्पना गरिएको छ ।

इजरायललाई समर्थन गर्ने देशहरू र प्यालेस्टिनीहरूको नजिकका देशहरूबीच समूहभित्र विभाजनका कारण इयूले गाजामा दुई वर्षको युद्धको क्रममा प्रभाव पार्न सङ्घर्ष गरेको छ । यस क्षेत्रमा दीर्घकालीन सुरक्षा पुनस्र्थापना गर्ने प्रयासको एक भागको रूपमा भूमिका पुनः प्राप्त गर्न इच्छुक इयूले प्यालेस्टिनी प्रहरी अधिकारीहरूलाई प्रशिक्षण दिने प्रस्ताव गर्नेछ ।

उनीहरू गाजाको हमास शासकहरूसँग सम्बद्ध हुने छैनन् । गाजामा करिब सात हजार प्रहरी अझै पनि प्यालेस्टाइन प्राधिकरणको खर्चमा सेवाका लागि छुट्टाइएका छन् । यो बलले वेस्ट बैङ्कलाई नियन्त्रण गर्दछ । -रासस/एएफपी