मोर्क–वडावन जुम्ला सडक स्तरोन्नति

सुर्खेत । पश्चिम जाजरकोटस्थित मोर्क–वडावन जुम्ला सडक स्तरोन्नति थालिएको छ । छेडा चाँदे–जुम्ला सडकखण्डअन्तर्गत पर्ने सडक निर्माण तीव्र बनाइएको हो । पहिलो चरणमा १७ किलोमिटर सडक निर्माण भइरहेको छ । छेडागाड नगरपालिकाको रिटेखोलामा रहेको मोटरेबल पुल पनि निर्माण भइरहेको छ । कच्ची कटानको काम भएपछि हाल स्तरोन्नति सुरु भएको हो । 

मध्यपहाडी लोकमार्ग, भेरी करिडोरसँग जोडिएर जुम्ला जोड्नका लागि काम धमाधाम भइरहेको छ । पश्चिमका छेडागाड, जुनिचाँदे गाउँपालिकाका साथै कुशे गाउँपालिकालाई यो सडकले जोडिन्छ । पश्चिम जाजरकोटको सबैभन्दा छोटो तथा महत्त्वपूर्ण सडकका रूपमा रहेको यो सडकले जुम्ला जोड्नका लागि महत्त्वपूर्ण भूमिका खेल्छ । 

जाजरकोट क्षेत्र नं २ का लागि यो सडकलाई लाइफलाइनका रूपमा लिइन्छ । पालिकाले यही सडकसँग जोडेर आन्तरिक सडक निर्माण तीव्र बनाएको छेडागाड नगरपालिकाका उपप्रमुख अपिल थापाले बताए । 

छेडाबाट मोर्कसम्मको सडक निर्माण अन्तिम चरणमा पुगेको अवस्थामा बाँकी मोर्क–वडावनभित्रको १७ किलोमिटर सडकको काम सुरु भएको हो ।

सर्वाधिक समस्याका रूपमा रहेको यो सडक छेडागाड नगरपालिकाको अधिकांश भागलाई छुने गर्छ । ग्रामीण सडक सञ्जाल सुधार आयोजना कार्यान्वयन एकाइ सुर्खेतका प्रमुख हरि वलीका अनुसार काम तीव्रगतिमा रहेको छ । 

सन् २०२४ अप्रिल १० मा सम्झौता भएको यो सडक ७३० दिनमा निर्माण कार्य पूरा गर्ने लक्ष्य छ । ४४ करोड १९ लाख ५३ हजार रुपैयाँमा काम भइरहेको कार्यालय प्रमुख वलीले जानकारी दिए । 

चालु आर्थिक वर्षमै यो काम पूरा हुने उनले बताए । हाल पूर्वाधारको काम ६० प्रतिशत र आर्थिक पक्षको काम ५६ प्रतिशत प्रगति भएको छ । 

मन्त्रालयको सचिवसहितको टिमले यो सडकको अनुगमन गरेर राम्रो प्रगति भएको भन्दै चालु आवमै पूरा गर्ने लक्ष्यका साथ काम भइरहेको बताइएको छ ।

त्यसैगरी, यो सडकको दोस्रो चरणको कामसमेत छिट्टै सुरु गर्ने तयारीमा रहेको भौतिक पूर्वाधार तथा सहरी विकास मन्त्रालयका प्रवक्ता रमेश सुवेदीले जानकारी दिए ।

उनका अनुसार वडावनबाट जुम्लाको सिमानासम्म अर्को ठेक्का खोल्ने अन्तिम तयारी भइरहेको छ । त्यसका लागि प्रक्रियागत काम जारी रहेको उनले जानकारी दिए । कच्ची कटान भएको ठाउँमा स्तरोन्नतिको कामका लागि बोलपत्र हुन लागेको हो । रासस