जर्मनीको ह्याम्बर्ग सहरमा गोली चल्दा कैयौंको मृत्यु

काठमाडाैं । उत्तरी जर्मनीको ह्याम्बर्ग सहरस्थित यहोवाका साक्षीहरूको सभा हलमा भएको गोलीकाण्डमा कयौं व्यक्तिको मृत्यु भएको छ । मृत्यु हुनेको यकिन संख्या खुल्न सकेको छैन ।

यहोवाका साक्षीहरू क्रिस्चियन-आधारित धार्मिक आन्दोलनसँग सम्बन्धित एउटा गुट हो । यो संप्रदाय अमेरिकामा १९ औं शताब्दीमा स्थापित भएको थियो । प्रहरीका अनुसार ‘ घटनामा बन्दुकधारीको मृत्यु भएको हुनसक्ने आशंका छ । जर्मनिका स्थानीय सञ्चारमाध्यमले मारिएको पुष्टि गरेका ६–७ जनामा ​​बन्दुकधारी पनि पर्छन् वा छैनन् भन्ने कुरा अझै स्पष्ट भइसकेको छैन । बन्दुकधारीले गोली प्रहार गर्नुको उद्देश्य के थियो भन्ने बारे यकिन जानकारी नभएको प्रहरीले जनाएको छ ।

यसबाहेक ग्रस बोरस्टेल जिल्लाको देलबोज सडकमा भएको गोलीकाण्डमा कैयौं घाइते भएका छन् । प्रहरी प्रवक्ता होल्गर वेहरेनले स्थानीय समय अनुसार २१.१५ बजे बैठक हलमा गोली चलेको खबर पाएको बताए । उनले भने, घटनास्थलमा पुगेका अधिकारीहरूले “केही मानिसलाई बन्दुकबाट गम्भीर रूपमा घाइते र भुइँमा लडिरहेका भेट्टाए, जसमध्ये केहीको अवस्था गम्भीर छ।”

“त्यसपछि हामीले भवनको माथिल्लो भागबाट गोली चलेको आवाज सुन्यौं, त्यहाँ पुग्दा एक व्यक्तिको शव भेटियो । अहिलेसम्म अपराधी घटनास्थलबाट भागेको कुनै सङ्केत छैन ।” वेहरेनले भने, “हामीलाई अहिलेसम्म थाहा छ कि यो दुर्घटनामा धेरैको मृत्यु भएको छ, धेरै मानिस घाइते भएका छन्, जसलाई अस्पताल लगिएको छ।”

वरपरका क्षेत्रमा बसोबास गर्ने मानिसहरूलाई घरबाट बाहिर ननिस्कन भनिएको छ। सार्वजनिक भएको फुटेजमा प्रहरीले बैठक हलबाट मानिसहरूलाई बाहिर निकालेको देखिन्छ।

ह्याम्बर्गका गृहमन्त्री एन्डी ग्रोटेले ट्वीटरमा लेखेका छन्, “घटनास्थलमा प्रहरी विशेष बल र ठूलो संख्यामा अधिकारीहरू तैनाथ गरिएको छ।” प्रहरीले कुनै पनि हल्लामा विस्वास नगर्न तथा हल्ला नफैल्याउन सर्वसाधारण सँग अपिल गरेको छ ।