शुक्रबार, जेठ ३, २०८२

जी-सेभेनको शिखर सम्मेलन आज सकिँदै

नेपालखोज २०८० जेठ ७ गते ८:४७

एजेन्सी । विश्वका सात प्रमुख धनी राष्ट्रहरूको समूह (जी–सेभेन)को शिखर सम्मेलन आइतबार समापन हुँदैछ । गत शुक्रबार जापानको हिरोसिमा शहरमा सुरु भएको सम्मेलनबाट रुसमाथि थप आर्थिक प्रतिबन्ध लगाउने निर्णय भएको छ ।

यस्तै सम्मेलनले चीनको बढ्दो आर्थिक तथा सैन्य गतिविधिप्रति चिन्ता ब्यक्त गरेको छ । रुसमाथि लगाइएको थप आर्थिक नाकाबन्दीमा रुसी हिरा निर्यात रोक्ने विषय प्रमुख रहेको छ ।

रुसले वार्षिक ४ अर्ब डलर भन्दा बढीको हिरा निर्यात गर्ने गर्दछ । यस्तै रुसबाट तामा, आल्मुनियम र निकलको निकासी पनि विश्व बजारमा जान नदिने सहमति जी सेभेनका नेताहरुले गरका छन् ।

बैठकपछि जारी गरिएको संयुक्त वक्तब्यमा रुसले कब्जा गरेको युक्रेनी भूमि फिर्ता गर्नुपर्ने विषयलाई जोडदार रुपमा उठाइएको छ । त्यसैगरी चिनियाँ गतिविधिप्रति पनि उनीहरुले उसैगरी चिन्ता ब्यक्त गरेका छन् ।

चीनले हिन्द–प्रशान्त क्षेत्रमा बढाएको सैन्य तथा आर्थिक गतिविधिप्रति उनीहरुले चिन्ता ब्यक्त गरेका छन् । विशेष गरी चीनले आर्थिक मामिलालाई सैन्य गतिविधिसँग जोडेको भन्दै जी सेभेनका नेताहरुले चीनसँग प्रत्यक्ष संवाद गर्ने निर्णय गरेका छन् ।

चीनसँग ‘स्थिर र रचनात्मक’ सम्बन्ध रहनुपर्ने निष्कर्ष निकालेका उनीहरुले विश्वको दोस्रो ठूलो अर्थतन्त्र चीनसँग पश्चिमा शक्तिहरू र जापानबीच तनाव थप बढ्न नदिने प्रतिवद्धता पनि जनाएका छन् ।

प्रतिक्रिया