बिहारमा महागठबन्धनको निराशाजनक पराजयपछि काङ्ग्रेस नेता गान्धी र खर्गेबीच भेटवार्ता

नयाँदिल्ली । भारतको बिहार विधानसभा चुनावमा महागठबन्धनको भारी पराजयपछि प्रतिनिधिसभाका विपक्षी नेता तथा कांग्रेस सांसद राहुल गान्धी पार्टी अध्यक्ष मल्लिकार्जुन खर्गेको निवास पुग्नुभएको छ। बैठकमा पार्टीको खराब प्रदर्शनको मूल्याङ्कनमा केन्द्रित हुने अपेक्षा गरिएको छ।

यसअघि शुक्रबार राहुल गान्धीले बिहार विधानसभा चुनावमा सुरुदेखि नै अनुचित प्रभाव परेको दाबी गर्नुभएको थियो । काङ्ग्रेसले ६१ सिटमा चुनाव लडेपनि दोहोरो अङ्कमा मतपरिणाम ल्याउन सकेन । सन् २०२० को बिहार चुनावमा काङ्ग्रेस पार्टीले लडेको ७० सिटमध्ये १९ सिट जितेको थियो। चुनावपछि पार्टीले आफ्नो प्रदर्शनको समीक्षा गर्ने र काङ्ग्रेस संविधान र लोकतन्त्रको रक्षाका लागि लडिरहने गान्धीले बताए ।

कांग्रेस सांसद जयराम रमेशले महागठबन्धनको हारका लागि ‘भोट चोरी’लाई जिम्मेवार ठहराउँदै प्रधानमन्त्री नरेन्द्र मोदी, गृहमन्त्री अमित शाह र निर्वाचन आयोग यसको पछाडि ‘मास्टरमाइन्ड’ रहेको बताएका छन् । महागठबन्धनमा उनीहरूको सहयोगी राष्ट्रिय जनता दल (आरजेडी) ले मात्र २५ सिट जितेको छ र २४३ सदस्यीय विधानसभामा महागठबन्धनको कुल सङ्ख्या ३५ पुगेको छ।

यसैबीच, एनडीएले सन् २०२५ को बिहार चुनावमा ऐतिहासिक विजय प्राप्त गरेको छ। राज्यको २४३ सीटमध्ये एनडिएले २०२ सिट जितेको छ। यो २४३ सदस्यीय प्रतिनिधिसभामा एनडिए गठबन्धनको लागि तीन चौथाइ बहुमत हो । विधानसभा चुनावमा एनडीएले २०० को आँकडा पार गरेको यो दोस्रो पटक हो ।

सन् २०१० को निर्वाचनमा उसले २०६ सिट जितेको थियो । एनडीएमा भारतीय जनता पार्टी (भाजपा) ले ८९, जनता दल (युनाइटेड) ले ८५, लोक जनशक्ति पार्टी (रामविलास) ले १९, हिन्दुस्तानी आवाम मोर्चा (सेक्युलर) ले पाँच र राष्ट्रिय लोक मोर्चाले चार सिट जितेका छन् । भारतीय कम्युनिस्ट पार्टी (माक्र्सवादी–लेनिनवादी) (लिवरेसन) –भारतीय समावेशी पार्टी र भारतीय कम्युनिस्ट पार्टी (माक्र्सवादी) –सहित अन्य महागठबन्धन पार्टीहरूले क्रमशः दुई, एक र एक सिट प्राप्त गरेका निर्वाचन आयोगले जनाएको छ।

त्यस्तै, अल इन्डिया मजलिस–ए–इत्तेहादुल मुस्लिमिनले पाँच सिट जितेको छ भने बहुजन समाज पार्टीले एक सिट जितेको छ। बिहार विधानसभा चुनाव नोभेम्बर ६ र ११ मा क्रमशः दुई चरणमा सम्पन्न भएको निर्वाचनमा बिहारमा ऐतिहासिक ६७.१३ प्रतिशत मतदान भएको थियो । –रासस/एएफपी