मजदूरको ज्याला बढ्यो: न्यूनतम ९ सय ताेकियाे
काठमाडाैं । नयाँ आर्थिक वर्ष शुरु भएसँगै जिल्ला दररेट निर्धारण समितिले मजदूरको ज्यालामा हेरफेर गरेको छ । जिल्ला प्रशासन कार्यालयअन्तर्गतको समितिले बजार महँगी बढ्दै गएपछि दैनिक ज्याला मजदूरी गर्नेको पारिश्रमिक बढाएको हो ।
समितिले निर्धारण गरेको दररेटअनुसार अब सरकारी काममा खटिने मजदूरको दैनिक ज्याला १ सय बढेको छ । आर्थिक ऐनअनुसार १२ प्रतिशतसम्म मजदूरको ज्याला बढाइएको हो । निजी तथा गैरसरकारी सङ्घ–संस्थामा दैनिक ज्याला मजदूरी गर्नेको पारिश्रमिक पनि बढेको छ । अब डकर्मी, सिकर्मी, चित्रकार र पेन्टरको ज्यालामा १ सय बढेको छ । यसअघि दैनिक ८ सय पाउने मजदूरले अबदेखि ९ सय पारिश्रमिक पाउनेछन् ।
निर्धारित दररेटअनुसार अब ज्यामीको दैनिक ६ सय, पलम्बरको ६ सय ८८ रूपैयाँ, सिनियर पलम्बरको ७ सय, इलेक्ट्रिसियन हेल्परको ६ सय, इलेक्ट्रिसियनको ७ सय, निर्माण सामग्री परीक्षण गर्ने ल्याब असिस्टेन्सको ६ सय ४० र टेक्निसियनको ७ सय ४५ तोकिएको छ । त्यस्तै, हलुका ड्राइभरको हकमा ६ सय ६०, हेभी ड्राइभरको हकमा ७ सय ३०, हेभि इक्विप्मेन्ट अप्रेटरको ८ सय २०, ड्राइभर सहयोगीको ६ सय, नगर निरीक्षकअर्थात कार्यालय सहयोगी सरहलाई ६ सय, नर्सरी नाइके, क्याम्पस वर्कर, चौकीदार, कुचीकार, सर्भे हेल्पर र मालीको ६ सय दैनिक ज्याला निर्धारण गरिएको छ ।
मजदूरको हकमा २६ दिनसम्म काम गरेको खण्डमा एक महिना मान्नुपर्ने समितिले निर्णय गरेको छ । अबदेखि मजदूरले २६ दिनमात्रै काम गरे पनि एक महिनाको पारिश्रमिक उपलब्ध गराउनुपर्नेछ । जिल्ला प्रशासन कार्यालय सुर्खेतका प्रशासकीय अधिकृत पदमलाल लामिछानेले नेपाल सरकारको आर्थिक ऐनअनुसार सरकारी क्षेत्रका काम गर्ने मजदूर र निर्माण सामग्रीको हकमा मूल्य निर्धारण गरिएको बताउनुभयो । “समितिले निर्धारण गरेको दररेटअनुसारै कारोवार हुनेछ”, उहाँले भन्नुभयो, “आफूखुशी बजार मूल्य तोक्ने र मजदूरलाई कम ज्याला दिएर शोषण गर्नेलाई कानूनबमोजिम कारवाही गरिनेछ ।”
मूल्य निर्धारण समितिले विद्युतीयलगायतको केही सामग्रीको मूल्य निर्धारण गर्न भने सकेको छैन । विद्यूतीय पोल ट्रकबाट ढुवानी र विद्युत्सम्बन्धी सम्पूर्ण निर्माण सामग्रीको मूल्य बाँकेमा स्वीकृत दररेट तथा ढुवानीअनुसार कायम हुने व्यवस्था गरिएको छ । हालसम्म जिल्लामा स्वीकृत दररेटमा समावेश नभएको जनाउँदै उक्त सामग्रीको हकमा बाँकेमा लागू गरिएको मूल्यसूची सुर्खेतमा लागू गर्नुपरेको हो । मूल्य निर्धारण समितिले अधिकांश निर्माण सामग्रीको मूल्य गत वर्षकै यथावत राखेको छ । इँटाको मूल्य भने यसपालि ५ सय बढाइएको छ ।
श्रीखण्ड, रक्तचन्दनलगायतको मूल्य तोकियो
मूल्य निर्धारण समितिले बहुमूल्य जडीबुटी श्रीखण्ड, रक्तचन्दनलगायतको मूल्य तोकेको छ । जसअनुसार प्रतिकेजी श्रीखण्डको ३ हजार, रक्तचन्दनको २ हजार, कपुरको२ हजार ५ सय, तेजपत्ताको १ हजार तथा लप्सी, टिमूर र बकाइनोको ३/३ सय तोकिएको छ । रुद्राक्ष प्रतिगोटाको २ सय रूपैयाँ, सर्पगन्धको ५ सय रूपैयाँ तोकिएको छ । त्यस्तै, बिरुवाका लागि दाँते ओखर प्रतिगोटाको २५ रूपैयाँ, उन्नत जातको चिली प्रतिगोटाको १ सय रूपैयाँ निर्धारण गरिएको जिप्रकाले जनाएको छ । रासस
प्रतिक्रिया