भारतको कर्नाटकमा दुई साता कर्फ्यु

भारत । भारतको कर्नाटकमा कोरोना भाइरसको संक्रमण बढ्दै गएपछि दुई साताका लागि कर्फ्यू घोषणा भएको छ। मंगलबार राति ९ बजेदेखि १४ दिनका लागि कर्नाटक राज्य सरकारले कर्फ्यू लागु गरेको हो । उपमुख्यमन्त्री सिएन अश्वत नारायणले मे १० सम्म कर्फ्यू जारी रहने बताएका छन्। त्यसक्रममा कडा प्रतिबन्ध लाग्ने उनले उल्लेख गरेका छन्।

कर्फ्यूका बेला बिहान ६ बजेदेखि राति १० बजेसम्म अत्यावश्यक सेवा मात्रै सञ्चालन हुने छ। पछिल्लो २४ घण्टामा कर्नाटकमा ३४ हजार ८०४ जनामा कोरोना भाइरसको संक्रमण पुष्टि भएको छ भने १४३ जनाको ज्यान गएको छ। अहिले राज्यमा कोरोना भाइरसका दुई लाख ६२ हजार १६२ जना सक्रिय संक्रमित छन्। हालसम्म कोभिड–१९ बाट १४ हजार ४२६ जनाको ज्यान गएको छ।