बिहीबार, चैत १५, २०८०

हामी ट्वाल्ल

केशव आचार्य २०७८ भदौ २६ गते १७:४५
केशव आचार्य

बुझी नसक्नु, गुरुको खेल – हामी ट्वाल्ल।
हिजो पास भन्थे, आज फेल – हामी ट्वाल्ल।

भन्थे- विद्यालय सभ्यताको मन्दिर हो,
मन्दिर भित्रै, ठेलम-ठेल – हामी ट्वाल्ल।

कोही गुरु तल त, कोही माथि मञ्चम,
खोइ किन हो, पेलम्-पेल – हामी ट्वाल्ल।

बम्किने, चम्किने, चिच्याउने – कराउने,
यो चल्ने हो अझै, कतिन्जेल – हामी ट्वाल्ल ।

भन्ने गर्छन्- ‘हाम्रो योगदान सानो छैन’,
धेरै भोग्या अरे, जेल-नेल – हामी ट्वाल्ल ।

हामीले सिक्नु के ? यी अगुवाहरुबाट,
बाध्य छौं हेर्न, यो अनमेल – हामी ट्वाल्ल ।

आफ्नो गाँस काटी-काटी पाल्ने चाहिँ हामी,
निकाल्ने भए हाम्रो नै तेल – हामी ट्वाल्ल ।

प्रतिक्रिया