‘कोरोनाविरुद्धको खोप अभियान निरन्तर सञ्चालन हुन्छ’

काठमाडौं । स्वास्थ्य तथा जनसंख्या राज्यमन्त्री उमेश श्रेष्ठले कोरोनाविरुद्धको खोप अभियान निरन्तर सञ्चालन हुने बताएका छन् ।

सोमबार संसद् भवनमा सञ्चारकर्मीसँग कुरा गर्दै मन्त्री श्रेष्ठले नेपालमा निरन्तर रूपमा खोप आइरहेको भन्दै खोप अभियान पनि निरन्तर रूपमा सञ्चालन हुने बताएका हुन् ।

सञ्चारकर्मीहरुको जिज्ञासाको जवाफ दिदैँ स्वास्थ्य तथा जनसंख्या राज्यमन्त्री उमेश श्रेष्ठले ४४ लाख कोरोना विरुद्धको खोप आइसकेको भन्दै अब १० दिन खोप वितरण गर्ने सरकारको योजना रहेको बताए ।

उनले खोप लगाउन छुटेका विभिन्न क्षेत्रका १८ वर्ष माथिका उमेरसमुहलाई खोप व्यवस्था गरिने बताए । उनले भने, ‘४४ लाख खोप आइसकेको छ । जम्मा अहिलेसम्म १ करोड ७७ लाख खोप आएको छ ।अहिले १० दिन खोप वितरण गर्ने योजना छ । जसमध्ये यो १८ वर्ष माथिका छुटेका विभिन्न सेक्टरमा लागेका सबैलाई खोप दिने व्यवस्था गर्न लागेका छौँ ।’

राज्यमन्त्री श्रेष्ठले उत्तरी भेगका १३ वटा जिल्लामा पूर्ण रुपमा खोप लगाउने व्यवस्था गर्न लागेको पनि बताए ।