आन्तरिक हवाई उडानको भाडा २२० रुपैयाँ बढ्यो

काठमाडौं । आन्तरिक हवाई उडानको भाडा बढेको छ । हवाई इन्धनको मूल्यवृद्धि भएसँगै वायुसेवा सञ्चालकले हवाई भाडा बढाएका हुन् । हवाई टिकटमा जोडिने इन्धन वापतको मूल्य बढाइएको हो ।

हवाई इन्धनमा आन्तरिकतर्फ प्रतिलिटर ५ रुपैयाँ मूल्य बढेको छ । हाल आन्तरिकतर्फको हवाई इन्धनको मूल्य प्रतिलिटर १०१ रुपैयाँ पुगेको छ । इन्धनको मूल्य बढेपछि भाडा पनि बढाइएको हो। इन्धन वापत बढिमा २२० रुपैयाँ भाडा बढेको छ ।

नेपाल नागरिक उड्डयन प्राधिकरणबाट समेत परिमार्जित मूल्यलाई स्वीकृति प्रदान भएसँगै भोलिबाट यो भाडादर लागु हुँदैछ ।