‘एलपी ग्यास होइन विद्युतीय चुल्हो बालौं’

काठमाडौं । ऊर्जा, जलस्रोत तथा सिँचाइमन्त्री पम्फा भुसालले प्रत्येक नागरिकको भान्छाबाट एलपी ग्यास विस्थापित गरेर विद्युतीय चुल्होको प्रयोगलाई बढाएर लैजानुपर्ने बताएकी छन् । ललितपुर महानगरपालिका ६, लगनखेलस्थित एक सहकारी संस्थाको साधारणसभालाई सम्बोधन गर्दै उनले सहकारीका सम्पूर्ण सेयर सदस्यले विद्युतीय चुल्होको प्रयोग गर्ने व्यवस्था मिलाउन आग्रह गरिन् ।
‘सहकारीले वितरण गर्ने लाभांश वा मासिक किस्ताबन्दीबाट सम्पूर्ण सेयर सदस्यलाई विद्युतीय चुल्हो खरिद गरेर दिनुहोला’ उनले भनिन्, ‘राष्ट्रिय अर्थतन्त्रको विकासमा सहकारीले आफ्नो पूँजी यसतर्फ लगाउनुपर्छ ।’ साधारणसभामा सेयर सदस्यलाई विद्युतीय चुल्हो वितरण गर्ने प्रस्ताव पेस हुने र उक्त प्रस्ताव पारित हुने विश्वास लिएको उनले वताइन् ।

‘एलपी ग्यासको पैसा डलरमा तिर्नुपर्छ, नेपालमै उत्पादित बिजुलीको प्रचुर प्रयोग गर्नुपर्छ, यसले देशभक्तिको पनि पहिचान दिन्छ’, उनले भनिन्, ‘नेपालको बिजुली सस्तो छ, हाम्रो देशको पैसा हाम्रै देशमा रहन्छ । यसबाट मुलुकको आर्थिक गतिविधिमा नयाँपन आउँछ ।’
एलपी ग्यासको तुलनामा विद्युतीय चुल्होबाट खाना पकाउन लागत कम पर्ने विभिन्न अध्ययनले देखाएका छन् । पेट्रोलियम पदार्थको आयातका कारण मुलुकको अर्थतन्त्रमा नाकारात्मक प्रभाव परेको छ । जनतालाई राहत दिन सरकारले विद्युतको महसुल घटाएको जानकारी दिँदै उनले विद्युतीय उपकरणको प्रयोगमा बढवा दिन उपभोक्तासमक्ष आग्रह गरेकी छन् ।

सरकारले यही मङ्सिर १ गतेदेखि लागू हुनेगरी विद्युतको महसुल घटाएको छ । त्यस्तै विद्युतीय सवारीको आयातमा पनि भन्सार महसुल घटाइएको छ । ‘नेपाल आयल निगमले एलपी ग्यासमा नोक्सान व्यहोरिरहेको छ । अन्तर्राष्ट्रिय बजारमा पेट्रोलियम पदार्थको मूल्य बढेकोबढै छ’, मन्त्री भुसालले भनिन्, ‘ग्यासको मूल्य जति बढ्छ, बढ्न दिउँ, हामीले हाम्रो ठाउँबाट सिलिन्डर विस्थापित गरेर विद्युतीय चुल्हो भित्र्याउँ ।’

निमगले पेट्रोलियम पदार्थको कारोबारबाट मासिक चार अर्ब रुपैया बढी नोक्सानी व्यहोर्दै आएको छ । एलपी ग्यासमा मात्रै निगमले मासिक साढे दुई अर्ब बढी नोक्सानी व्यहोरेको छ । पेट्रोलियम सवारी साधनको सट्टा विद्युतीय सवारी खरिद गर्न पनि मन्त्री भुसालले आग्रह गरेकी छन् ।