दुई गजल

१.
सफर गरेर आयो
निस्किरह्यो सफरमा सफर गरेर आयो
एक फकिर पलभरमा सफर गरेर आयो

आत्मविश्वासले रहेछ बाँच्न सिकाउने
हेर त माछा बगरमा सफर गरेर आयो

आज मनमा बस्ने अनुमति माग्दैछ ईस्वर
हिजोसम्म पथ्थरमा सफर गरेर आयो

हिलोमा सडक बनेर फूलिरहेछ कमल
लाग्ला तिम्रो नजरमा सफर गरेर आयो ।

२.
ठीक छ भन्नु पर्छ
समय परिवर्तनको नजिक छ भन्नु पर्छ
कुरुक्षेत्रमा गएर कलम बिक्छ भन्नु पर्छ

घरि घरको पिर लाग्छ, घरि देशको चिन्ता
के छ ? भनि सोध्छौ तिमी ठिक छ भन्नु पर्छ

हरेकपटक मौनताले जवाफ फर्काउँछौ
मैले पनि मेरो मान्छे सालिक छ भन्नुपर्छ

हिटलरहरु रकम तिर्दै नियालेर जान्छन्
यो देशमा बुद्धसमेत श्रमिक छ भन्नुपर्छ

फुटपातमा लगेर जिन्दगी बेच्नेहरुले पनि
मजबुत छ, भरपर्दो छ, टिक्छ भन्नु पर्छ ।