वीरेन्द्र-ऐश्वर्य उद्यान अन्तिम चरणमा

बागलुङ । बागलुङ बजारमा रहेको वीरेन्द्र-ऐश्वर्य उद्यान पुनर्निर्माण अन्तिम चरणमा पुगेको छ । अहिले उद्यानमा फूलका बिरुवा र दुबो रोप्ने, ढुंगा छाप्ने र विद्युतीकरणको काम भइरहेको छ । लामो समयदेखि अस्तव्यस्त बनेको उद्यानलाई नयाँ र आधुनिक शैलीमा पानीको फोहोरासहित पुनर्निर्माण थालिएको थियो ।

उद्यान पुनर्निर्माणको अहिले ६६ प्रतिशत काम पूरा भइसकेको छ भने एक महिना ठेक्का म्याद थपेर बाँकी काम सम्पन्नपश्चात नगरपालिकाले लिने गरी काम भइरहेको बागलुङ नगरपालिकाका इन्जिनियर सोविन घर्तीले जानकारी दिए । ‘पूर्वाधार निर्माणको काम सबै सकिएको छ, अहिले विद्युतीकरण, फूल रोप्ने, दुबो लगाउने तयारीमा छौँ,’ उनले भने, ‘असार मसान्तसम्म सबै काम सकिनेछ, उद्यान निकै पृथक र आधुनिक शैलीमा निर्माण भएको छ, बागलुङ आएका पर्यटकलाई समेत यसले आकर्षण गर्नेछ ।’

स्थानीय सुमन रानाले भने, ‘बागलुङ बजारमा एकैछिन विश्राम गरौं भन्ने कुनै ठाउँ थिएन, उद्यान कुरुप बनेपछि झनै समस्या थियो, यो कोलाहल बिर्साउने ठाउँका रुपमा विकास भएको छ,’ उनले भने । नगरपालिकाले एए कन्स्ट्रक्सनसँग ८४ लाख रुपैयाँमा चार महिनामा उद्यान पुनर्निर्माण गर्ने गरी ठेक्का सम्झौता गरिएको थियो । गत वैशाख ३ गतेसम्म सक्नुपर्ने उद्यान अहिले असारसम्म म्याद थपेर काम सक्ने निर्माण कम्पनीको तयारी छ ।

तत्कालीन राजा वीरेन्द्र र रानी ऐश्वर्यको सालिकसहित उद्यानको सौन्दर्यकरण तथा स्थापना गरिएको थियो । विसं ०६२/६३ को जनआन्दोलनका क्रममा उद्यानभित्रका वीरेन्द्र-ऐश्वर्यको सालिक फुटाइएपछि उद्यान क्रमशः कुरुप हुँदै आएको थियो ।

उद्यानको मुख्य भागमा पानीको फोहोरा र विद्युतीकरण हुनेछ भने पदमार्गमा ताराखोलाको स्लेटढुंगा छापिएको छ । उद्यानवरपर विभिन्न फूल र बिरुवा रोपिनेछ । उद्यान पुनर्निर्माण अन्तिम चरणमा पुगेपछि बागलुङ बजारवासी खुसी भएका छन् । -रासस