कोलकाताले बेंगलोरलाई ८१ रनले हरायो

काठमाडाैं । कोलकाता नाइट राइडर्सले आइपीएल -२०२३ मा रोयल च्यालेन्जर्स बेंगलोरलाई ८१ रनको ठूलो अन्तरले पराजित गर्दै पहिलो जित दर्ता गरेको छ। पहिले ब्याटिङ गरेको कोलकाता नाइट राइडर्सले २० ओभरमा सात विकेट गुमाएर २ सय ४ रन बनाएको थियो । जवाफमा रोयल च्यालेन्जर्स बेंगलोर राम्रो सुरुवातका बाबजुद १ सय २३ रन बनाएर अलआउट भयो ।

कप्तान फाफ डुप्लेसी र विराट कोहलीको तीव्र ब्याटिङका ​​कारण बेंगलोरले पहिलो चार ओभरमा ४२ रन बनाएको थियो । तर पाँचौं ओभरमा सुनिल नारायणले विराट कोहलीलाई बोल्ड गरे । विराटले १८ बलमा २१ रन बनाए । अर्को ओभरमा वरुण चक्रवर्तीले क्याप्टेन डुप्लेसीलाई बोल्ड गरे । डुप्लेसीले १२ बलमा २३ रन बनाए । खेलको आठौं ओभरमा वरुणले पहिले ग्लेन म्याक्सवेल (५ रन) र हर्ल पटेललाई दुई बलपछि शून्यमा बोल्ड गरे ।

८ ओभरपछि बेंगलोरको स्कोर चार विकेटमा ५४ रन थियो। ९औं ओभरमा सुनिल नारायणले शाहबाज अहमदलाई आउट गर्दै बेंगलोरलाई पाँचौं झटका दिए । रोयल च्यालेन्जर्स बेंगलोरको आधा टिम ६१ रनमा प्याभेलियन फर्किएको थियो । यसपछि पिचमा आएका दिनेश कार्तिकले छैटौं विकेटका लागि माइकल ब्रेसवेलसँग २२ रन जोडे । त्यसपछि नितिश राणाले खेलका नायक शार्दुल ठाकुरलाई बल दिए र उनी आउनेबित्तिकै ब्रेसवेलको विकेट लिए । यसअघि २० बलमा शार्दुल ठाकुरको अर्धशतकको मद्दतले कोलकाता नाइट राइडर्सले रोयल च्यालेन्जर्स बेंगलोरलाई जितका लागि २ सय ५ रनको लक्ष्य दिएको थियो। ८९ रनमा पाँच विकेट गुमाएपछि कोलकाता नाइट राइडर्सको अवस्था निकै नाजुक थियो ।

यस्तो बेला शार्दुल ठाकुर पिचमा आए । उनले टिमको इनिङ्स मात्र ह्यान्डल गरेनन् आईपीएल २०२३ को सबैभन्दा छिटो अर्धशतक पनि बनाए। यो इनिङ्समा शार्दुल ठाकुरले २९ बलमा ९ चौका र तीन छक्का प्रहार गर्दै ६८ रन बनाए । त्यस्तै अर्को छेउबाट रिंकु सिंहले पनि ३३ बलमा ४६ रनको द्रुत इनिङ खेले । दुवैले छैटौं विकेटका लागि शतकिय (१०३ रनको) साझेदारी खेले। इडेन गार्डेनमा जारी आईपीएलको नवौं खेलमा रोयल च्यालेन्जर्स बेंगलोरले टस जितेर कोलकाता नाइट राइडर्सलाई पहिले ब्याटिङ गराएको थियो ।