‘संगीतसँग यात्रा’ भव्यताका साथ सम्पन्न

काठमाडौं । एरेञ्जर राजु खड्काको अथक साङ्गीतिक यात्राले २५ औँ वसन्त पार गरेको अवसरमा रेशराज प्रोडक्शन प्रा.ली.को आयोजनामा ‘सङ्गीतसँग यात्रा’ कार्यक्रम भव्यताका साथ सम्पन्न भएको छ ।

यही शनिवार काठमाडौं जमलस्थित राष्ट्रिय नाचघरमा सम्पन्न उक्त कार्यक्रमको अवसरमा चलचित्र ‘उस्ताद जी’ को टेलर पनि सार्वजनिक गरियो ।

वरिष्ठ कलाकार तथा नेपाल चलचित्र कलाकार सङ्घका अध्यक्ष, निर्देशक, निर्माता तथा लेखक मोहन निरौलाको अध्यक्षतामा सम्पन्न कार्यक्रममा कला क्षेत्रका विभिन्न स्रष्टाहरूलाई सम्मान गरिएको थियो ।

सम्मानित हुने कलाकारहरूमा वरिष्ठ गायिका ज्ञानु राणा, वरिष्ठ गायक लाक्पा शेर्पा, वरिष्ठ साउण्ड डिजाइनर दीप रत्न तुलाधर, राष्ट्रवादी नायक-निर्माता तथा निर्देशक नवल खड्का, वरिष्ठ गीत तथा कथाकार मीन सागर लामा, वरिष्ठ सङ्गीतकार आभाष फुयाँल, वरिष्ठ गायक, सङ्गीत संयोजक तथा सङ्गीतकार पवन वाङ लामा, वरिष्ठ वाद्यवादक भरत बुढाथोकी, वरिष्ठ गीतकार दुर्गा लामा, गायक पञ्चमान तामाङ (शैलाब वाईवा), गायक उत्सव सुब्बा लामा र गायक मरिचमान तामाङ साथै अन्य चर्चित कलाकारहरू रहनुभएको छ ।

‘चलचित्रका नायकहरू आउँछन्, एक दुई वर्षमै गायब हुन्छन् तर गीत सङ्गीतका नायकहरू भने सदा जनतामा छाइरहन्छन् ।’ –कार्यक्रममा प्रमुख अतिथिको आसनबाट बोल्दै मोहन निरौलाले भने– ‘त्यसैले गीत सङ्गीतलाई महत्त्व र मान्यता दिन सकिएमा हाम्रो सङ्गीतको स्तर बढ्दै जानेछ, जसले अन्ततः देशलाई नै फाइदा पुग्नेछ ।’

कार्यक्रम रेशराज प्रोडक्शन प्रा.ली.का अध्यक्ष गायक रेशम कुमार विश्वकर्माको सभापतित्वमा सम्पन्न भएको हो ।