दाङमा ‘राष्ट्रिय बाल चलचित्र महोत्सव’आजदेखि

काठमाडौं । चलचित्र विकास बोर्डले आजदेखि प्रथम राष्ट्रिय बाल चलचित्र महोत्सवको आयोजना गर्दैछ । यो महोत्सव ३ गते सम्म दाङमा चल्नेछ ।

चलचित्र विकास बोर्डका सदस्य रवि अधिकारीका अनुसार महोत्सवमा बालबालिकासँग सम्बन्धित लामा तथा छोटा शिक्षामूलक चलचित्र प्रदर्शन हुनेछन भने चलचित्र ज्ञानसम्बन्धी हाजिरी जवाफ प्रतियोगिता, पुस्तक प्रदर्शनी एवम् फोटो प्रदर्शनी तथा चलचित्र नृत्य प्रतियोगितासमेत संचालन गरिनेछ ।

‘बालबालिका माझ चलचित्रको माध्यमबाट शिक्षा र संस्कृतिलाई अगाडि बढाउने, बालबालिकालाई चलचित्रको अभ्यास गराउने, बाल चलचित्र क्लब गठन तथा सञ्चालनमा प्रोत्साहन गर्ने, विभिन्न राष्ट्रिय तथा अन्तर्राष्ट्रिय बाल चलचित्र महोत्सवमा नेपालका बालबालिका तथा उनीहरुले बनाएका चलचित्र सहभागी गराउन मद्दत पुर्याउने उद्देश्यसहित महोत्सव आयोजना गर्न लागिएको हो’,सदस्य अधिकारीले भने ।

महोत्सवको दौरान ‘बालबालिकासँग भुवन केसी’ खण्ड पनि प्रस्तुत हुनेछ जहाँ स्थानीय झाँक्री र सांस्कृतिक प्रदर्शनीसहित बोर्ड अध्यक्ष तथा विशिष्ट अभिनेता केसीको परिचयात्मक श्रव्यदृश्य सामग्रीसमेत प्रदर्शन हुने सदस्य अधिकारीले जानकारी दिएका छन् ।