गर्मी बढेपछि विद्यालयमा पठनपाठन बन्द

कञ्चनपुर । पछिल्लो केही दिनयता गर्मी अत्यधिक बढेपछि कञ्चनपुरको जनजीवन प्रभावित बनेको छ । गर्मीले घर बाहिर निस्किनै सकस भएपछि दैनिक जनजीवन नै प्रभावित बनेको हो । गर्मी बढेपछि स्थानीय तहले धमाधम विद्यालयमा पठनपाठन बन्द गर्न थालेका छन् ।

भीमदत्त, शुक्लाफाँटा र बेलौरी नगरपालिकाले गर्मी बिदा दिएका छन् । शुक्लाफाँटा नगरपालिकाले गर्मी बिदा थपेको छ । अत्यधिक गर्मी बढेकाले विद्यालयका पठनपाठन गर्न कठिनाइ भएपछि असार ३ देखि ६ गतेसम्म गर्मी बिदा थप्ने निर्णय भएको प्रमुख प्रशासकीय अधिकृत टेकेन्द्र भट्टले जानकारी दिए । ‘केही दिनयता गर्मी अत्यधिक बढ्यो, जसले यहाँको जनजीवन नै प्रभावित बनेको छ’, उनले भने, ‘त्यसैले नियमित पठनपाठन गर्न कठिनाइ तथा जोखिम भएकाले विद्यालय बन्द गरिएका हुन् ।’

नगरपालिकाभित्रका निजी तथा सरकारी विद्यालय बन्द गर्न पालिकाले पत्राचार गरेको छ । गर्मीले बालबालिकाको स्वास्थ्यमा पर्न सक्ने सम्भावित प्रतिकूल असरलाई मध्यनजर गर्दै विद्यालय बन्द गर्ने निर्णय गरिएको भीमदत्त नगरपालिका शिक्षा शाखा प्रमुख हरिदत्त जोशीले बताए । rss