ललिता निवास प्रकरणमा थप चार जना पक्राउ

काठमाडाैं । ललिता निवास प्रकरणमा केन्द्रीय अनुसन्धान ब्युरो (सिआइबी) ले थप चार जनालाई पक्राउ गरेको छ। पक्राउ पर्नेमा मालपोत कार्यालय, डिल्लीबजारका तत्कालीन प्रमुख कलाधर देउजा, कर्मचारी सुरेन्द्रमान कपाली, धर्मप्रसाद गौतम र हुपेन्द्रमणि केसी छन्। थप अनुसन्धानका लागि उनीहरूलाई पक्राउ गरेको सिआइबीले जनाएको छ।

सिआइबीले मंगबार बिहान मात्रै भाटभटेनी सुपरमार्केटका सञ्चालक मीनबहादुर गुरुङलाई पक्राउ गरिसकेको छ।

देउजा, कपाली, गौतम र केसी २०४९ सालदेखि २०६६ सम्म मालपोत कार्यालय र भूमि सुधार तथा व्यवस्था विभागमा कार्यरत थिए। उनीहरूले मिलेमतोमा सरकारी कागजात किर्ते गरी सरकारी जग्गा हडप्ने योजना बनाएको सिआइबीको अनुसन्धानमा खुलेको छ।

यसअघि सिआइबीले ललिता निवास जग्गा प्रकरणमा चारवटा अनुसन्धान प्रतिवेदन तयार पारी २०७८ मंसिरमा सरकारी वकिलको कार्यालयमा प्रतिवेदन बुझाएको थियो। त्यतिबेला सरकारी वकिलको कार्यालयले पर्याप्त अनुसन्धान नगरेको भन्दै निर्देशनसहित फाइल फिर्ता पठाएको थियो। – INS