पाकिस्तान र श्रीलंकाबीच गर वा मरको खेल
एसिया कपको सुपर फोर खेलमा आज बिहीबार पाकिस्तान र श्रीलंकाबीचको खेल सेमिफाइनल सरह हुनेछ । भारतले सुपर फोरमा श्रीलंकालाई ४१ रनले हराउँदै फाइनलमा स्थान बनाएको छ ।
श्रीलंका र पाकिस्तानबीचको आजको खेल दिउँसो ३ : १५ मा कोलोम्बोमा सुरु हुनेछ । श्रीलंका र पाकिस्तान दुबैको समान दुई खेलमा २–२ अंक छ । सुपर फोरमा श्रीलंकाले बंगलादेशलाई २१ रनले हराएको थियो भने पाकिस्तानले बंगलादेशलाई ७ विकेटले हराएको थियो ।
भारत २ खेलमा ४ अंकका साथ शीर्ष स्थानमा छ । श्रीलंका नेटरनरेटको कारण दोस्रो, पाकिस्तान तेस्रो र बंगलादेश अंक विहीन हुँदै पुछारमा छन् । बंगलादेश सुपर फोरबाटै बाहिरिएको छ । श्रीलंका र पाकिस्तानबीचको खेलबाट विजेता टोलीको ४ अंक हुनेछ । ४ अंक हुने टोली शीर्ष दुईमा रहँदै फाइनल खेल्नेछ ।
यदि वर्षाको कारण रद्द भए दुबै टोलीको समान ३ अंक हुनेछ । नेटरनरेटको कारण श्रीलंका फाइनल खेल्नेछ । श्रीलंकाको नेटरनरेट माइनस ०–२०० छ । पाकिस्तानको नेटरनरेट माइनस १.८९२ छ ।
यदि खेल रद्द हुँदा भारतसँगको २ सय २८ रनको हार पाकिस्तान बाहिरिनुको मुख्य कारण बन्नेछ । समूह चरणको अन्तिम खेल शुक्रबार भारत र बंगलादेशबीच हुनेछ । फाइनल आइतबार हुनेछ ।
प्रतिक्रिया