क्यानाडामा पहिलो संगीत यात्रा गर्दै नेपथ्य

काठमाडौं । सांगीतिक समुह ‘नेपथ्य’ ले पहिलो पटक क्यानाडाको संगीतयात्रा गर्ने भएको छ ।

निर्धारित तालिका अनुसार अक्टोबरको १ तारिख आइतबारको दिन नेपथ्यले आफूलाई क्यालगरी सहरको दी प्यालेस थिएटरमा उभ्याउने छ ।

त्यसपछि अक्टोबर ४ तारिख, बुधबार ब्याण्डको प्रस्तुति भ्यानकुभर सहरको दी भोग थिएटरमा हुनेछ । यी दुवै सहर क्यानाडाको पश्चिमी भेगमा पर्छन् । यात्राको अन्तिम शो भने मुलुककै पूर्ववर्ती सहर टोरन्टोका दर्शकमाझ हुनेछ । अक्टोबर ८ तारिख, आइतबारका दिन ब्याण्ड टोरन्टोस्थित क्यानाडाकै बिख्यात कार्यक्रम स्थल म्यासी हलमा प्रस्तुत हुनेछ ।

सन् १८९४ मा खुलेको क्यानाडाको म्यासी हल त्यसको सय वर्ष पुग्नै लाग्दा अर्थात् सन् १९८१ मा मुलुककै नेशनल हिस्टोरिक साइट (राष्ट्रिय ऐतिहासिक स्मारक) मा सूचीकृत भएको थियो । त्यहाँ विश्वविख्यात सांगीतिक समूहहरुले आफूलाई प्रस्तुत गरिसकेको इतिहास छ ।

दुर्इ महिनाअघि मात्र म्यासी हलले सामाजिक सञ्जालमार्फत् नेपथ्य कन्सर्टको तालिका घोषणा गर्दा क्यानाडामै बसोबास गर्दै आएकी लेखिका मन्जुश्री थापाले सामाजिक सञ्जालमार्फत खुशी प्रकट गरेकी थिइन्– ‘नेपथ्य आउने समाचारले केहि शितलता महशुस गराएको छ,’ उनले अगाडि थपेकी थिइन्– ‘माओवादी द्वन्द्कालको चरम निराशाका क्षणमा आशाको सञ्चार गरेर लगाइदिएको गुनका निम्ति नेपथ्य सदैव प्रिय छ ।’

सन् २००२ मा नेपालयले व्यवस्थापन सम्हालेपछि नेपथ्यले हालसम्म १६ वटा देशको २८ सहरमा ७८ वटा कार्यक्रम गरिसकेको छ । क्यानाडा नेपथ्यको १७ औं गन्तव्य राष्ट्र हुनेछ ।

केहि समययता नेपालीका निम्ति क्यानाडा आप्रवासनको आकर्षक गन्तब्य बन्दै आएको छ । त्यसमा पनि विशेषगरि अध्ययनका लागि त्यसतर्फ जाने नेपाली विद्यार्थीहरुको संख्या वर्षेनी बढ्दो छ ।

‘केहि वर्षअघिसम्म पनि यहाँ नेपाली अनुहार मुश्किलले देखिन्थे,’ टोरन्टोका दिलिप पौडेल भन्छन्– ‘अहिले सार्वजनिक यातायात, कलेज, रेष्टुरेन्ट र बाटाघाटामा पनि नेपाली बोलिरहेका मानिस देखिनु सामान्यजस्तै बन्दै गएको छ ।’

बढ्दो जनसंख्यासंगै यहाँका नेपाली संघ–संस्थाहरुले आयोजना गर्ने विभिन्न खाले सांगीतिक कार्यक्रमहरुको संख्या पनि नियमित बन्दै गएको छ ।

‘यहाँको नेपाली समुदायले म्यासी हल जस्तो सम्मानित कार्यक्रम स्थलमा नेपाली कलाकारलाई प्रस्तुत गर्न लागेको सम्भवत यो नै पहिलो पटक हो,’ अर्का क्यानाडावासी रविन थपलिया भन्छन् ।

सन २०२३ भरि नेपथ्यका सबै प्रस्तुतिहरुलाई ‘मानवताका लागि संगीत’ को नारा सहित मानवता प्रबर्धन अभियानको श्रृंखलाको रुपमा प्रस्तुत गर्ने विचार अनुरुप यसपटकको नेपथ्य क्यानाडा शृंखला पनि त्यही नारा अन्तर्गत अगाडि बढ्ने छ ।

‘‘क्यानाडामा हुने प्राय नेपाली कार्यक्रमहरु अमेरिकी यात्रासँग जोडिएर आयोजना गरिएको पाइन्छ,’ व्यवस्थापन सम्हाल्दै आएको नेपालयका किरणकृष्ण श्रेष्ठ भन्छन् – ‘नेपाली कलाकारहरुले क्यानाडाको मात्र यात्रा गरेको घटना विरलै हुने गरेकोमा यसपाली त्यो सम्भावनाको ढोका पनि उघार्ने अठोट लिएका छौं ।’

नेपाली विद्यार्थीहरुको रोजाइमा पर्ने प्रमुख गन्तब्य मध्येको क्यानाडामा नेपाली जनसंख्या वृद्धि भएसँगै त्यतातिर हाम्रो कलाको बजार पनि विस्तार हुने संभावना देखिन थालेको श्रेष्ठ थप्छन् ।

नेपालयले उचित व्यवस्थापनमार्फत नेपथ्यको प्रस्तुतिमा एकरुपता ल्याउनका लागि नेपालमा र विदेशमा नेपथ्यसँग अनुभव बटुलेका प्राबिधिकहरुलाई यात्रा टोलीमा सम्मिलित गर्दै आएको छ । सोहि अनुरुप, अघिल्लो महिनाको श्रृंखलावद्ध जापान यात्रामा सम्मिलित ८ जना प्राविधिज्ञ एवं व्यवस्थापक र ६ संगीतकर्मीसहित जम्मा १४ जनाको टोली क्यानाडा यात्रामा समावेश हुनेछन् ।

‘हाम्रो लागि क्यानाडा नयाँ गन्तब्य भएता पनि त्यहाँ बसोबास गर्ने नेपालीहरुले देखाउनु भएको उत्साहबाट असाध्यै हौसला मिलिरहेको छ,’ ब्याण्डका अगुवा एवं मुख्य गायक अमृत गुरुङ भन्छन्– ‘दशैँको मुखमा स्वदेशको सम्झना र थुप्रै माया बोकेर मञ्चमा उभिने छौं ।’

क्यानाडामा रहेका शुभचिन्तकहरुले सामाजिक सञ्जालमार्फत् दिइरहेको सन्देश आफूलाई प्राप्त भइरहेको अमृतले जानकारी दिए ।

‘कतिपय प्रसंशकहरुले समुह बनाउँदै अर्कै सहरदेखिको लामो दुरी तय गरेर पायक पर्ने सहरमा कन्सर्ट हेर्न आउने जानकारी दिइरहनु भएको छ,’ अमृत भन्छन्– ‘यो मायाका लागि म र मेरो टिम आभारी छौं ।’

क्यानाडाको तीन वटै कन्सर्टमा अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुबिन शाक्य, गितारमा निरज गुरुङ र मादलमा शान्ति रायमाझीले साथ दिनेछन् ।

क्यानाडाका तीनवटै सहरहरुमा नेपथ्य कन्सर्टका निम्ति स्थानीय समय अनुसार बेलुकीको पाँच बजे प्रवेश खुला गरिने छ भने ठीक सात बजे कन्सर्ट सुरु हुनेछ । अनलाइनबाट टिकटको बिक्रि व्यवस्थापन भैरहेको यात्राका सबै कन्सर्टहरुमा विद्यार्थी समुहको निम्ति विशेष छुटको ब्यवस्था पनि गरिएको छ । टिकट तथा अन्य जानकारी नेपथ्यको अधिकारिक वेबसाइट (www.nepathya.com.np) र सामाजिक सञ्जालका पानाहरुमार्फत उपलब्ध भएको नेपथ्यले जनाएको छ ।