अमेरिकामा हुने त्रिकोणात्मक सिरिजको खेल तालिका सार्वजनिक

काठमाडौं । आइसिसी विश्वकप लिग टु अन्तर्गत नेपालले अमेरिकामा खेल्ने त्रिकोणात्मक ओडिआई सिरिजको खेलतालिका सार्वजनिक भएको छ ।

सिरिज कात्तिक ९ देखि १९ गतेसम्म आयोजना हुनेछ । सिरिजमा नेपाल र अमेरिका सहित स्कटल्यान्डको पनि सहभागिता रहने छ ।

सिरिजमा नेपालको पहिलो खेल कात्तिक ११ गते अमेरिकासँग तथा दोस्रो खेल कात्तिक १३ गते स्कटल्यान्डसँग हुनेछ ।

नेपालले तेस्रो खेलमा कात्तिक १७ गते अमेरिकासँग र चौथो तथा अन्तिम खेलमा कात्तिक १९ गते स्कटल्यान्डसँग प्रतिस्पर्धा खेल्नेछ ।

सिरिजको सबै खेल अमेरिकाको टेक्सासस्थित ह्युस्टनमा रहेको प्रेरि भ्यूमा हुनेछ। सबै खेल नेपाली समयअनुसार राति १०ः१५ बजे सुरु हुनेछ।

लिग टुको ओडिआई सिरिज पछि तीनै टोलीबिच टि ट्वान्टी सिरिज पनि हुनेछ । क्यानडा र ओमानविरूद्धको त्रिकोणात्मक एकदिवसीय सिरिजका लागि अहिले नेपाली राष्ट्रिय क्रिकेट टोली क्यानडामा छ।