बैंकिङ कसुर मुद्दाका फरार प्रतिवादी पक्राउ

बैंकिङ कसुर मुद्दाका फरार प्रतिवादी अछाम साँफेवगर नगरपालिका–३ घर भई काठमाडौं महानगरपालिका–३१ आलोकनगर बस्ने २० वर्षीय आकाश कुँवरलाई बिहीबार साँझ प्रहरीले पक्राउ गरेको छ ।

जिल्ला अदालत काठमाडौं बबरमहलको गत साउन २३ गतेको फैसलाले ४ लाख जरिवाना र १६ हजार रूपैयाँ क्षतिपूर्ति बापत पीडित राहतकोषमा जम्मा गराउने सजाय ठहर भई फरार रहेका उनलाई काठमाडौं उपत्यका अपराध अनुसन्धान कार्यालय काठमाडौंबाट खटिएको प्रहरीले काठमाडौं मैतीदेवीबाट पक्राउ गरेको हो । उनलाई फैसला कार्यान्वयनको लागि जिल्ला अदालत ललितपुर पाटन पठाइएको छ ।

हत्या गरेको अभियोगमा पक्राउ

बुढीगंगा नगरपालिका–२ नडाङ सनइवाडा बस्ने हर्क सनइकी छोरी ८ वर्षीया विनिता नेपालीको हत्या गरेको अभियोगमा सोही ठाउँ बस्ने ४८ वर्षीय नन्दे सनइलाई शुक्रबार साँझ प्रहरीले पक्राउ गरेको छ ।

नन्देले धारिलो हतियार प्रहार गरी विनिताको हत्या गरेको भन्ने खबर प्राप्त हुनासाथ जिल्ला प्रहरी कार्यालय बाजुरा समेतबाट खटिएको प्रहरीले उनलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।

अवैध लागूऔषध गाँजा बरामद

पर्साको वीरगंज महानगरपालिका–२१ परवानीपुर हनुमान चोकबाट अवैध लागूऔषध गाँजा १२ किलो ५ सय ग्राम शुक्रबार बेलुकी प्रहरीले बरामद गरेको छ । प्रहरी चौकी परवानीपुरबाट खटिएको प्रहरीले उक्त गाँजा फेला पारी बरामद गरेको हो ।
महोत्तरी, मनरासिस्वा नगरपालिका–९ बथनाहा गाउँबाट अवैध लागूऔषध गाँजा करिब ५ किलो ५ सय ग्राम शनिबार बिहान प्रहरीले बरामद गरेको छ ।

प्रहरी चौकी बथनाहाबाट खटिएको प्रहरीले उक्त स्थानमा रहेको बीआर ०६ सिएन ७५२८ नम्बरको मोटरसाइकल तलासी गर्दा बोरामा रहेको उक्त गाँजा फेला पारी बरामद गरेको हो । हाल फरार मोटरसाइकल चालकको प्रहरीले खोजी गरिरहेको छ । यस सम्बन्धमा प्रहरीले आवश्यक अनुसन्धान गरिरहेको छ ।