भोजपुरको विकट ‘लुङ्थुङ’मा स्वास्थ्य इकाई स्थापना

भोजपुर । भौगोलिक रुपमा विकट रहेको भोजपुरको हतुवागढी ४ लुङ्थुङमा सामुदायिक स्वास्थ्य इकाई स्थापना गरिएको छ । नागरिकलाई सहज स्वास्थ्य सेवा पुर्याउने लक्ष्यले यहाँ सामुदायिक स्वास्थ्य इकाई स्थापना गरिएको हो । स्वास्थ्य इकाई स्थापनाले यहाँका करिव तीन सय घरपरिवार लाभान्वित बनेका छन् । लुङ्थुङका नागरिकलाई सहज स्वास्थ्य सेवा पुर्याउने लक्ष्यले सामुदायिक स्वास्थ्य इकाई स्थापना गरेर सेवा प्रवाह थालिएको हतुवगढी ४ खैराङका अध्यक्ष चन्द्रबहादुर विष्टले जानकारी दिए ।

स्थानीयबासीलाई समान्य स्वास्थ्य सेवा लिनसमेत समस्या भएपछि वडाको पहलमा स्वास्थ्य इकाई स्थापना गरिएको वडाध्यक्ष विष्टले बताए । ‘लुङ्थुङ भौगोलिक रुपमा विकट र निकै ठूलो भूगोल छ’ वडाध्यक्ष विष्टले भने,’यहाँ स्वास्थ्य संस्था नहुँदा सामन्य स्वास्थ्य सेवा लिन पनि घण्टौँ हिड्नु पर्ने अवस्था थियो । नागरिकले भोगेको सास्तीलाई ध्यानमा राखेर स्वास्थ्य इकाई स्थापना गरेर सेवा प्रवाह गरेका हौँ ।’

गाउँ नै स्वास्थ्य इकाई स्थापना भएपछि स्थानीय खुसी भएका छन् । सामान्य प्राथमिक स्वास्थ्य उपचार नपाउँदा अकालमा ज्यान गुमाउनु पर्ने अवस्था रहेकोमा स्वास्थ्य इकाई स्थापनाले सहजता भएको स्थानीयबासी तिर्थाकुमारी राईले बताए ‘गाउँ नै स्वास्थ्य इकाई स्थापनाले सहजता थपिएको छ’ उनले भने,’हामीले आधारभूत स्वास्थ्य सेवा पाउन नै कठिन थियो । यहाँ नै सेवा लिन पाउँदा खुसी लागेको छ । बीच गाउँमा नै स्वास्थ्य संस्था स्थापना भएपछि सेवा लिन सहज छ ।

स्वास्थ्य इकाई स्थापनाले विरामी हुँदा सिटामोल तथा जीवनजल लिनको लागि घण्टाैँ धाउनु पर्ने अवस्थाको अन्त्य भएको स्थानीयबासी मानबहादुर राईले बताए । स्वास्थ्य इकाई स्थापनाले वर्षौँदेखी स्थानीयले भोग्दै आएको समस्याको अन्त्य भएको उनको भनाइ छ । ‘नजिकमा स्वास्थ्य संस्था नहुँदा लामो समयदेखी समस्या भोग्दै आएका थियौँ’ उनले भने,’अहिले गाउँमा नै स्वास्थ्य इकाई सञ्चालनमा आएको छ । अव समान्य विरामी हुँदा घण्टौँ लगाएर अन्यत्र जानु पर्ने समस्या हटेको छ ।’

नागरिकलाई सहज र सरल रुपमा सेवा प्रवाह गर्न योजनाबद्ध रुपमा काम भईरहेको गाउँपालिका अध्यक्ष प्रेमकुमार राईले बताए । भौगोलिक विकटताका कारण सेवा प्रवाहमा समस्या देखिएपछि सामुदायिक स्वास्थ्य इकाई सञ्चालनमा ल्याएर नागरिकलाई सेवा प्रवाह थालिएको अध्यक्ष राईको भनाइ छ ।

खैराङका साविकका वडाहरु २, ३, ४, ५ र ६ का स्थानीयलाई लक्षित गरेर लुङ्थुङमा सामुदायिक स्वास्थ्य इकाईमार्फत सेवा प्रवाह थालिउको अध्यक्ष राईले बताए । यहाँको सामुदायिक भवनबाट स्वास्थ्य सेवा प्रवाह थालिएको अध्यक्ष राईले जानकारी दिए । ‘गाउँपालिकाले नागरिकलाई दिने सेवालाई सहज र सरल बनाउने अभियान जुटेका छौँ’ अध्यक्ष राईले भने,’भौगोलिक विकटताका कारण नागरिकलाई सेवा लिन समस्या छ । त्यस्ता ठाउँमा पनि सहज सेवा पुर्याउने काम गरिरहेका छौँ ।’

गाउँपािलकाले स्वास्थ्य, शिक्षासँगै यहाँको सडक, विद्युत्, पूर्वाधारलगायतको विकासमा योजनाबद्ध रुपमा काम गरिरहेको उनको भनाइ छ । निर्वाचनमा गरेको प्रतिवद्धता अनुसार यहाँ स्वास्थ्य इकाई स्थापना गरेर सञ्चालन ल्याइएको अध्यक्ष राईको भनाइ छ ।

हतुवागढी गाउँपालिकामा एक प्राथमिक स्वास्थ्य केन्द्र, पाँच वटा स्वास्थ्य चौकी, तीन वटा आधारभूत स्वास्थ्य केन्द्र र दुई सामुदायिक स्वास्थ्य इकाईमार्फत सेवा प्रवाह भइरहेको अध्यक्ष राईले जानकारी दिए ।