मेक्सिकन नौसेनाको जहाज न्यूयोर्कको ब्रुकलिन ब्रिजमा ठोक्कियो

काठमाडाैं । न्यूयोर्क शहरको ब्रुकलिन ब्रिजमा ठोक्किएपछि मेक्सिकन नौसेना प्रशिक्षण जहाजमा क्षति पुगेको छ । यो जहाज त्यहाँ विशेष कार्यक्रमको लागि गएको थियो ।

शनिबार साँझ जहाज यस पुलमुनिबाट गइरहेकाे बेला मस्तूल (जहाजमा रहेको अग्लो खम्बा) पुलमा ठोक्किएको भिडियो सार्वजनिक भएको छ ।

रिपोर्टका अनुसार, ठोक्किएपछि जहाजको मस्तूलको केही भाग भाँचिएर जहाजमा खसेको थियो र अमेरिकी मिडियाले धेरै जना घाइते भएको जनाएका थिए ।

न्यूयोर्क शहरको आपतकालीन व्यवस्थापन एजेन्सीले राहत कार्यमा संलग्न रहेको बताएको छ तर थप विवरण भने दिएको छैन । मेक्सिकन नौसेनाले जहाज क्षतिग्रस्त भएको पुष्टि गरेको छ । घटनाको अनुसन्धान भइरहेको पनि जनाइएकाे छ । बीबीसीबाट