कर्णाली प्रदेशसभाको बैठक पुनः सुरु

कर्णाली । प्रतिपक्षी दल नेकपा (माओवादी केन्द्र)को अवरोधपछि स्थगित कर्णाली प्रदेशसभाको बैठक पुनः सुरु भएको छ ।

सभामुख नन्दा गुरुङको अध्यक्षतामा प्रतिपक्षी दल माओवादी केन्द्रसहित समाजवादी र सत्ता साझेदार दल नेपाली कांग्रेस तथा नेपाल कम्युनिष्ट पार्टी (एमाले)बीच भएको छलफलमा मुख्यमन्त्री यामलाल कँडेलले सभाबाटै प्रतिपक्षीले उठाएका विषयहरु सम्बोधन गर्ने सहमति जुटेपछि बैठक पुनः सुचारु भएको प्रदेशसभा सचिवालयका सचिव जीवराज बुढाथोकीले जानकारी दिए ।

चौधौँ बैठक सुरु भएपश्चात् मुख्यमन्त्री कँडेलले प्रतिपक्षी दलले उठाएको विषयमा प्रदेश सरकारको ध्यानाकर्षण भएको स्वीकार गर्दै त्यसको सम्बोधन गर्ने बताए । उनका अनुसार सबै योजना वर्गीकृत गर्न नसकिएको तर सूचीकृत गर्ने व्यवस्था मिलाइएको छ ।

यो काममा योजना आयोगको भूमिका नभएको बताउँदै उनले प्राविधिक समस्या समाधान गर्ने प्रतिबद्धता जनाए । यसअघि बसेको तेह्रौँ बैठकमा प्रतिपक्षी दल माओवादी केन्द्रले योजना बैंकमा योजना प्रविष्ट गर्ने विधि गलत भएको र त्यो नसच्याएसम्म सदनका कामकारबाही अगाडि बढ्न नदिने भन्दै बैठक अवरोध गरेको थियो ।