एमालेको केन्द्रीय सचिवालय बैठक जारी, पार्टीको आसन्न पोलिटब्युरो र केन्द्रीय कमिटी बैठकको तयारीबारे छलफल

काठमाडाैं । नेकपा एमालेको केन्द्रीय सचिवालय बैठक पार्टी कार्यालय च्यासलमा जारी छ । पार्टी केन्द्रीय कार्यालय च्यासल ललितपुरमा जारी बैठकमा पार्टीको आसन्न पोलिटब्युरो र केन्द्रीय कमिटी बैठकको तयारी छलफलको एजेन्डामा रहेको नेताहरुले जनाएका छन् ।

एमाले सचिव योगेश भट्टराईले विधान महाधिवेशनको सन्दर्भमा बैठकमा छलफल भइरहेको जानकारी दिए । विधानको संशोधन प्रस्ताव, राजनीतिक प्रस्तावका साथै संगठनात्मक प्रतिवेदनलाई बैठकले अन्तिम रुप दिने उनले बताए ।

सचिवालय बैठकपछि पोलिट्व्युरो हुँदै केन्द्रीय समितिले दस्तावेजलाई पारित गर्ने उहाले बताए । भट्टराईले पूर्वराष्ट्रपति विद्यादेवी भण्डारी एमालेको राजनीतिमा फर्किने घोषणा गरिसकेको अवस्थामा पार्टीभित्र उचित छलफल हुने बताए । यस बिषयमा पार्टी अध्यक्षले नै पूर्वराष्ट्रपति भण्डारीसँग छलफल गर्नुपर्ने उनको भनाइ छ ।

त्यस्तै उनले मन्त्रीहरुमाथि लगाइएका आरोप सत्य हो भने पदीय जिम्मेवारीबाट हट्नुपर्ने र छानविन हुनुपर्ने बताए । नेकपा एमालेको साउन २ गते बस्ने पोलिटब्युरो र ५ गते केन्द्रीय कमिटी बैठक बस्ने तयारी छ । त्यसै गरी आगामी भदौ २०, २१ गते ललितपुरको गोदावरीमा विधान महाधिवेशन गर्ने निर्णय पार्टीले गरेको छ ।