लिबियामा सुरक्षा कारबाहीका क्रममा ३५० जना गैरकानूनी आप्रवासी पक्राउ

त्रिपोली । लिबियाको टोब्रुक नगरपालिकाले गरेको सुरक्षा कारबाहीमा विभिन्न देशका तीन सय ५० अनियमित तथा गैरकानूनी आप्रवासीलाई पक्राउ गरेको लिबियाको अध्यागमन एजेन्सीले घोषणा गरेको छ ।

एजेन्सीले एक विज्ञप्तिमा सुरक्षा अपरेसन प्रवेश आवश्यकताहरूको उल्लङ्घन गर्नेहरूलाई पछ्याउन र सहर र यसको उपनगरहरू भित्र अनियमित आप्रवासी लुकेका ठाउँहरूमा छापा मार्न सुरु गरिएको गहन गस्तीको एक भाग रहेको बताएको छ । गिरफ्तार गरिएका व्यक्तिहरूको कानूनी स्थिति भिन्न रहेको एजेन्सीले औँल्याएको छ ।

केही आधिकारिक प्रक्रिया पूरा नगरी लिबियाको क्षेत्रमा प्रवेश गरेका थिए भने अरूले मरुभूमि मार्गबाट घुसपैठ गरेका थिए । कतिपयले समुद्र पार गरेर युरोपेली तटमा अवैध रूपमा बसाइँ सर्ने तयारी गरिरहेका थिए । युरोप पुग्न खोज्ने अनियमित आप्रवासीहरूका लागि लिबिया एउटा प्रमुख पारवहन विन्दु हो ।