पत्रकारिता दिवसको अवसरमा फोटो प्रदर्शनी

काठमाडौं । ९५औँ राष्ट्रिय फोटो पत्रकारिता दिवसको अवसरमा नेपाल फोटो पत्रकारहरुको संस्थाले फोटो प्रदर्शनी गरेका छन् । बसन्तपुरमा मंगलबार पिजे क्लव र नेपाल फोटो पत्रकार मंचले खुल्ला फोटो प्रदर्शनी गरेका हुन् ।

प्रदर्शनीमा फोटो पत्रकारहरुले पत्रकारिता गर्दैगर्दा भोगेका दुःख र जोखिमलाई अभिव्यक्त गर्ने किसिमका ३० वटा फोटोहरु राखिएका छन् । प्रदर्शनी आज एकदिन सम्म चल्ने नेपाल फोटो पत्रकार क्लव पिजे क्लब कि अध्यक्ष श्रुति श्रेष्ठले बताएकी छन् । प्रदर्शनीमा फोटो पत्रकारहरुले काम गर्ने क्रममा कत्तिको जोखिम, संघर्ष र चुनौती मोलेर काम गरिरहेका हुन्छन् भन्ने देखाउनेगरी फोटो प्रदर्शन गरिएको उनले बताएकी छन् ।

त्यसैगरी फोटो पत्रकारिताको इतिहासको बारेमा पनि सर्वसाधारणलाई जानकारी गराउने हिसाबले खुल्ला रुपमा प्रदर्शनी गरिएको उनले उल्लेख गरे । उनले भने, ‘फोटो पत्रकारले फिल्डमा कत्तिको जोखिम, संघर्ष, चुनौतीहरु मोलेर काम गरिरहेका हुन्छन् भन्नेकुरा देखाउने हिसाबले हामीले फोटो प्रदर्शनी गरेका हौँ । एउटा राम्रो फोटो खिच्नका लागि फोटो पत्रकारले कत्तिको मेहनत गर्नुपर्छ, कत्तिको जोखिम मोल्नुपर्छ भन्ने चिजहरु चाँही फोटोमार्फत् सबै व्यक्तिहरुलाई देखाउ भन्ने थिमको आधारमा हामीले यो फोटो प्रदर्शनी गरेको हौँ । सबैले नेपालको फोटो पत्रकारिता कुन दिनदेखि सुरु भएको, कसरी सुरु भएको भन्ने सर्वसाधारणलाई पनि ज्ञान होस् भन्ने आधारले हामीले आयोजना गरेका हौँ ।’

‘लेन्सबाट फोटो पत्रकारिता’मुल नारा दिई गरिएको फोटो प्रदर्शनीका लागि नेपाल पत्रकार महासंघ र सेन्टर फर मिडिया रिसर्च नेपालले सहयोग गरेका छन् । त्यसैगरी, ९५औँ राष्ट्रिय फोटो पत्रकारिता दिवसकै अवसरमा वसन्तपुरमै राष्ट्रिय फोटो पत्रकार समुह नेपालले पनि ‘नेपाल इन लकडाउन’ नाम दिई फोटो प्रदर्शनी गरेको छ । सो प्रदर्शनीमा कोभिड-१९ महामारीका कारण भएको लकडाउनको समयमा खिचिएका फोटोहरु प्रदर्शन गरिएको छ ।