भारतमा एकदिन अघि नै मनसुन भित्रियो : मुम्बई जलमग्न, रेल सेवा ठप्प

नयाँदिल्ली । भारतमा एक दिनअघि नै भित्रिएको मनसुनी प्रणालीका कारण विभिन्न सहर जलमग्न भएका छन् ।

भारतीय मौसम विभागका अनुसार भारतमा सामान्यत: जुन १० तारिखमा मनसुन भित्रिने गरे पनि यसपटक एक दिनअघि नै भारी मात्रामा वर्षा भएको छ ।

वर्षाका कारण मुम्बईका अधिकांश स्थान जलमग्न भएको भारतीय सञ्चारमाध्यमहरुले जनाएका छन् । मौसम विभागले आगामी पाँच दिनसम्म ठूलो वर्षाको सम्भावना रहेको भन्दै सुरक्षित रहन चेतावनी जारी गरेको छ ।

वर्षाका कारण पानी जमेपछि स्थानीय रेल सेवा ठप्प भएको छ । वर्षाका कारण केही स्थानमा ट्राफिक जामसमेत भएका छन् । आज पुणेमा पनि भारी वर्षाको सम्भावना रहेको भन्दै सतर्क रहन आग्रह गरिएको छ । -तस्बिर : एबीपी न्युज