प्रदेश ५ का ६ जिल्लामा सलह

बुटवल । भारतबाट आएको सलहको बथान प्रदेश ५ का ६ वटा जिल्लामा पुगेको छ। शनिबार रुपन्देही र पाल्पामा मात्रै देखिएको सलह फट्यांग्रा अन्य जिल्लामा पनि फैलिएको हो।

प्रदेशको रुपन्देही, कपिलवस्तु, पाल्पा, अर्घाखाची, गुल्मी र नवलपरासीमा सलह देखिएको प्रदेशको कृषि भूमि व्यवस्था तथा सहकारी मन्त्रालयले जनाएको छ।

मन्त्रालयतअन्तर्गतको कृषि विकास निर्देशनालयका प्रमुख यामनारायण देवकोटाले सलह ६ वटै जिल्लामा फैलिए पनि धेरै क्षति नभएको बताए।

आइतबार कपिलवस्तुमा अत्यधिक संख्यामा सलह देखिएको छ। कपिलवस्तु नगरपालिका, बुद्घभूमि नगरपालिकाको धनकौलीमा तरकारी र फलफूलमा क्षति गरेको किसानले बताएका छन्।

कपिलवस्तु कृषि ज्ञान केन्द्रले सलहले कति क्षति गर्‍यो भन्ने विवरण प्राप्त नभएको जनाएको छ। रूपन्देहीमा देखिएकाभन्दा कैयौ गुणा धेरै सलह कपिलवस्तुमा रहेको स्थानीयले बताए।