उच्च पहाडी तथा हिमाली क्षेत्रमा हल्का हिमपात, देशभर आंशिकदेखि सामान्य बदली रहने

काठमाडौं । हाल देशमा पश्चिमी वायुको प्रभाव रहेको जल तथा मौसम पूर्वानुमान महाशाखाले जनाएको छ । अहिले सुदूरपश्चिम प्रदेश, कर्णाली प्रदेशलगायत अन्य प्रदेशका पहाडी भू-भागहरुमा आंशिकदेखि सामान्य बदली रहेको छ भने पश्चिम र पूर्वी तराई भेगमा हुस्सु र कुहिरो लागेको विभागले जनाएको छ ।

आज दिउँसो देशभर आंशिकदेखि सामान्यतया बदली रहनेछ भने पहाडी भेगका थोरै स्थानहरुमा हल्का वर्षाको संभावना रहेको र देशका उच्च पहाडी तथा हिमाली भू-भागका केही स्थानमा हल्का हिमपातको संभावना रहेको महाशाखाले जनाएको छ ।

त्यस्तै, आज राति देशभर आंशिकदेखि सामान्यतया बदली रहनेछ भने प्रदेश नं १, वाग्मती प्रदेश, गण्डकी प्रदेश, कर्णाली प्रदेश तथा सुदूरपश्चिम प्रदेशका एक/दुई स्थानहरुमा हल्का वर्षाको संभावना रहेको र देशका उच्च पहाडी तथा हिमाली भू-भागका केही स्थानमा हल्का हिमपातको संभावना जल तथा मौसम पूर्वानुमान महाशाखाले जनाएको छ ।