नेपालमा लगानीका लागि भियतनामलाई चेम्बर अफ कमर्सको आग्रह
काठमाडौं । नेपाल चेम्बर अफ कमर्सले नेपालमा लगानीका लागि भियतनाम समक्ष आग्रह गरेको छ ।
प्रधानमन्त्री पुष्पकमल दाहालसंग भारत भ्रमणमा रहेको चेम्बर पदाधिकारी टोलीले नेपाल भुटान र भारतका लागि भियतनामका राजदूत न्गुयेन थान हायसंग छुट्टै भेटवार्ता गरेको हो ।
हायसंगको भेटवार्ताका क्रममा चेम्बर अध्यक्ष राजेन्द्र मल्लले नेपाल भियतनामबिच व्यापार अभिवृद्धि, लगानी प्रवर्द्धन, पर्यटन जस्ता क्षेत्रमा सहकार्य गर्नुपर्ने बताए ।
दुई मुलुकबिचको आर्थिक र कूटनीतिक सम्बन्धलाई प्रभावकारी र परिणाम मुखी बनाउनुपर्ने अध्यक्ष मल्लको भनाई छ । बौद्ध सर्किटको निर्माणका लागि आवश्यक पूर्वाधार बनाउन दुई देशको व्यापारिक समूहबिच सहकार्य गर्न समेत अध्यक्ष मल्लले हायसंग प्रस्ताव गरे ।
उनले भने, ‘दुई मुलुकबिच कटनीतिसंगै उच्चस्तरीय व्यापारिक साझेदारी हुदै आएको छ, भियतनाममा बुद्धका अनुयायीहरू पनि प्रशस्त हुन् । बौद्ध सर्किट बनाएर धार्मिक पर्यटनलाई आकर्षित गर्न सकिन्छ, ।’
चेम्बर पदाधिकारीहरुसंगको भेटमा नेपाल, भुटान र भारतका लागि भियतनामका राजदूत हायले आफूले नेपालको भ्रमण छिट्टै गर्न लागेको सुनाए । नेपाल र भियतनामबिच व्यापारिक साझेदारी वृद्धि गर्न सहयोग गर्ने हायको भनाई छ ।
हायसंगको भेटवार्तामा चेम्बर अध्यक्ष मल्लसहित निवर्तमान अध्यक्ष राजेशकाजी श्रेष्ठ, उपाध्यक्षहरू दिपक मल्होत्रा र उर्मिला श्रेष्ठको पनि सहभागिता रहेको थियो ।
प्रतिक्रिया