जिम्बाबेलाई नेपालले दियो २९१ रनको लक्ष्य

काठमाडौं । आइसिसी एकदिवसीय विश्वकप छनोट (ग्लोवल क्वालिफायर) को पहिलो खेलमा नेपालले जिम्बाबेलाई २९१ रनको लक्ष्य दिएको छ ।

हरारे स्पोर्टस क्लबमा टस हारेर ब्याटिङको निम्तो पाएको नेपालले ५० ओभरमा ८ विकेट गुमाउँदै ‍‍ २९० रन बनाएको हो ।

नेपालले पहिलो विकेटका रूपमा कुशल भुर्तेललाई गुमाएको थियो ।

कुशललाई ३१.५ ओभरमा वालिङटन मास्काडजाले बोल्ड गराएका थिए । कुशलले ९५ बलमा १३ चौका र दुई छक्काको मद्दतमा ९९ रन बनाए ।

यस्तै आसिफ शेख ६६ रनमा आउट भए । आसिफले १०० बलमा ७ चौका मद्दतमा ६६ रन बनाए । आसिफ वेलिङटन मसाकान्डाको बलमा रायन बुर्लद्वारा क्याच आउट भएका हुन् ।

कुशल मल्ल ४१ तथा रोहितकुमार पौडेल ३१ रनमा आउट भए । गुल्सन झा १३ रनमा आउट भए भने भीम सार्कीले खाता नै खोल्न सकेनन् ।

जिम्बाव्वेका रिचर्ड नागरभाले ४ विकेट लिए ।