भारतमा अनलाइन जुवामा प्रतिबन्ध लगाउने प्रयास

काठमाडौं । भारत सरकारले अनलाइन जुवामा प्रतिबन्ध लगाउनेसम्बन्धी संसदीय विधेयक बुधबार पेश गरेको छ । विधेयकमा लत, वित्तीय क्षति, र सम्पत्ति शुद्धीकरण र आतङ्कवादको वित्तपोषणको सम्भावित सम्बन्धको बारेमा चिन्ता व्यक्त गरिएको छ ।

यो कदमले अर्बौं डलरको उद्योगलाई खतरामा पार्न सक्छ जसमा अनलाइन तास सञ्जाल, वास्तविकजस्तो लाग्ने काल्पनिक अनलाइन खेल साथै भारतको अत्यधिक लोकप्रिय घरेलु काल्पनिक क्रिकेट अनुप्रयोगहरू समावेश छन् । यीमध्ये केहीले इन्डियन प्रिमियर लिग (आईपीएल) र राष्ट्रिय टोलीलाई प्रायोजनसमेत गर्ने गरेका छन् ।

संसदको तल्लो सदनमा पेश गरिएको विधेयकले पैसा जित्ने आशामा वेबसाइट वा एप्सलाई ‘शुल्क तिर्ने वा पैसा जम्मा गर्ने वा अन्य डिजिटल मुद्रा जम्मा गर्ने प्रयोगकर्ताले खेल्ने’ खेलहरू प्रस्तुत गर्नबाट रोक्ने लक्ष्य राखेको छ ।

यदि यो कानून पारित भएमा ‘अनलाइन मनि गेमिङ’ सेवा प्रदान गर्ने व्यक्ति र कम्पनीहरूलाई जेल सजाय वा जरिवाना लगाइनेछ ।

विधेयकमा ‘अनलाइन मनी गेम’ले युवा खेलाडीमा पार्ने सामाजिक र आर्थिक क्षतिका कारण प्रतिबन्ध आवश्यक रहेको भन्दै जेल सजाय वा जरिवानाको प्रस्ताव गरिएको छ ।

सांसदहरूले विधेयकले ‘वित्तीय धोखाधडी, मनी लाउन्ड्रिङ् र केही अवस्थामा, आतङ्कवादको वित्तपोषण गरेको अनलाइन खेल उद्योगको ‘अनियन्त्रित विस्तार’ को कारण प्रतिबन्ध आवश्यक भएको बताएका थिए । कानूनले युवा खेलाडीहरूको लागि सामाजिक र वित्तीय जोखिमहरू पनि औंल्याएको छ ।

उद्योग सङ्गठनहरूले यस कदमको कडा विरोध गर्दै यसले ठूलो विदेशी लगानी आकर्षित गरेको क्षेत्रलाई तहसनहस पार्न सक्ने चेतावनी दिएका छन् ।