पर्यटनमन्त्रीले भने- खर्चमा मितव्ययिता अपनाएको छु

काठमाडौं । संस्कृति, पर्यटन तथा नागरिक उड्डयनमन्त्री प्रेमबहादुर आलेले आफूले मन्त्रालयको कार्यभार सम्हालेपछि मन्त्रालयले गर्ने खर्चमा मितव्ययिता अपनाएको बताएका छन् ।

मन्त्रालयमा सोमबार आयोजित नेपाल वायुसेवा निगमलाई अन्तर्राष्ट्रिय उडानमा खतराजन्य पदार्थ आयात तथा निर्यातको अनुमति प्रमाणपत्र जारी गर्ने कार्यक्रममा आलेले आफूले मन्त्रालयको कार्यभार सम्हालेपछि मन्त्रालयमा हुने हरेक खर्चमा मितव्ययिता अपनाइएको दाबी गरे ।

आफूले नेपाली ध्वजाबाहक जहाजलाई नाफामा पुर्‍याउने चाहना राखेको उनको भनाइ थियो । अहिले नेपाल वायु सेवा निगम घाटामा गएको र ऋणको ब्याजसमेत तिर्न नसकेको भन्दै मन्त्री आलेले निगमलाई कुनैपनि हालतमा माथि उठाउनुपर्ने उनले बताए । ‘यो ध्वजावाहक जहाज भनेको यो नेपाली जनताले राजस्व तिरेर, कर तिरेर बनेको यो निगम हो । यसलाई कुनै पनि हालतमा माथि उठाउनैपर्छ । यो मन्त्रालयले हरेक खर्चमा पनि मितव्ययिता अपनाएको छ । हामी चाहान्छौँ कम भन्दा कम खर्चमा नेपाल ध्वजाबाहक जहाज नाफा होस् । फाइदा होस् । अहिलेपनि हामीलाई ५० अरब भन्दा बढी ऋण छ । हामी एकदमै चिन्तित छौँ । ९ प्रतिशत हामीले ब्याज तिरिराख्नु परेको छ । किस्ता हाम्रो ड्यु छ । ब्याज हामीले तिर्न सकेका छैनौँ,’ उनले भने, ‘विभिन्न समस्या समाधान गर्नका लागि म यहाँ आएको छु । राम्रो काम गर्दा कतिपय मान्छेहरुले आफ्नो व्यक्तिगत इन्ट्रेस्ट पूरा नहुँदा उनीहरुले विभिन्न मिडियामा लेखाउने कामहरु गरिराखेका छन् । त्यसमा मैले भन्नुपर्ने केही छैन । त्यो त तपाईंहरुले आफैँले पनि बुझ्न सक्नुहुन्छ ।’

मन्त्री आलेले खतराजन्य पदार्थ आयात-निर्यातको अनुमति पाउनु नेपालको लागि उपलब्धि भएको उल्लेख गरे । खतराजन्य पदार्थ आयात-निर्यातमा अब व्यवसायीहरुलाई झन्झट नहुने र नाफा हुने उनले बताए । उनले भने, ‘यहाँको स्थानीय लेभलमा यहाँका व्यवसायीहरुलाई पनि हरेक ठाउँमा झन्झट हुन्थ्यो । सामान ल्याउँदा कम्तीमा अब डाइरेक्ट आउन सक्ने भयो । त्यो पनि एउटा उपलब्धि हो । अर्को कुरा जुन सामानहरु हामी बाहिरबाट क्यारी गर्छौं त्योभन्दा दुई गुणा, तीन गुणा बढी हामीले पाउने भयौं ।’

मन्त्री आलेले आफू मन्त्रालय मातहतका सबै निकायको कमी, कमजोरी, विकृति र विसंगति सुधार्न प्रयासरत रहेको उल्लेख गर्दै सहयोग गर्न सम्बन्धित पक्षलाई आग्रहसमेत गरे ।