खुद मुनाफा २० प्रतिशतले बढेर तीन अर्ब ६० करोड पुग्यो

काठमाडौं । एनआईसी एसिया बैंक लिमिटेडले चालु आ.व. ०७८/७९ को तेस्रो त्रैमासिक अपरिस्कृत वित्तीय प्रतिवेदन सार्वजनिक गरेको छ । बैंकिङ क्षेत्रको अधिकांश वित्तीय सूचकांकमा अग्रणी स्थान ओगटेको बैंकका समग्र वित्तीय विवरणका परिसूचक उत्साहजनक रहेको बैंकले जानकारी दिएको छ ।

बैंकले आ.व. ०७८/७९ को तेस्रो त्रैमाससम्ममा कर्जा व्यवसायतर्फ कुल कर्जा रकम दुई खर्ब ७४ अर्ब ७४ करोड रुपैंयाँ पुर्याउन सफल भएको छ । साथै, निक्षेपतर्फ कुल निक्षेप संकलन तीन खर्ब दुई अर्ब ८१ करोड रुपैयाँ पुर्याउन सफल भएको जानकारी दिएको छ । बैंकले चालु आवको पछिल्लो त्रैमासमा खुद मुनाफातर्फ तीन अर्ब ६० करोड रुपैयाँ आर्जन गर्न सफल भएकोे छ । जुन वार्षिक विन्दुगत आधारमा २० प्रतिशतको वृद्धि हो ।

यसैगरी बैंकको स्व–पुँजीमा प्रतिफल २१ दशमलव ४६ प्रतिशत रहेको छ । जुन २७ वटै वाणिज्य बैंकमध्ये सबैभन्दा बढी रहेको अनुमान बैंकले गरेको छ । साथै, यस बैंकले वार्षिक प्रतिसेयर आम्दानी ४१ रुपैयाँ ९४ आर्जन गर्न बैंक सफल भएको छ, २७ वटै वाणिज्य बैंकमध्ये सबैभन्दा बढी रहेको अनुमान बैंकले गरेको छ ।

कोभिड–१९ को विषम् परिस्थितिमा समेत बैंकले कर्जा असुलीमा निकै उत्साहजनक नतिजा हासिल गर्न सफल भई निष्क्रिय कर्जालाई तेस्रो त्रैमाससम्ममा शून्य दशमलव ५१ प्रतिशतमा सीमित राख्न बैंक सफल भएको छ ।

बैंकले आ.व. ०७८/७९ को तेस्रो त्रैमाससम्ममा नौ लाखभन्दा बढी नयाँ खाता थप गर्दै ३७ लाखभन्दा बढी खातामार्फत ग्राहकहरूमाझ सेवा प्रदान गर्दै आइरहेको छ । यसै त्रैमाससम्ममा बैंकले कुल कर्जा लगानीको अंशमा करिब ८६ प्रतिशत साना तथा मझौला र रिटेल प्रकारका रणनीतिक क्षेत्रहरूमा कर्जा विस्तार गरेको छ । साना तथा मझौला कर्जा लगानीमा मुलुकका अन्य वाणिज्य बैंकभन्दा यस बैंक अग्रणी स्थानमा रहेको बैंकको दाबी छ ।

बैंकिङ क्षेत्रको विभिन्न वित्तीय तथा गैरवित्तीय सूचकांकहरूमा अग्रणी स्थानमा रहेको यस बैंक आ.व. ०७८/७९ को दोस्रो त्रैमासमा कर्जा विस्तार, निक्षेप संकलन, प्रतिसेयर आम्दानी, स्व–पुँजीमा प्रतिफल, ग्राहक संख्या, शाखा संख्या, विस्तारित काउन्टर संख्या, एटीएम संख्या, डेबिट कार्ड प्रयोगकर्ता, मोबाइल बैंकिङ प्रयोगकर्ता र सञ्चालन मुनाफा (कर्जा नोक्सानी व्यवस्थाअघिको) मा मुलुकका अन्य वाणिज्य बैंकहरूमध्ये पहिलो स्थान (ग्राहक संख्यामा निजी बैंकहरुमा पहिलो) ओगट्न सफल भएको थियो ।

बैंकलाई आमजनमानसले गरेको प्रगाढ विश्वास, अगाध स्नेह र बैंकप्रतिको भरोसाले गर्दा यो बैंक मुलुकभर रहेका तीन सय ५८ शाखा कार्यालय, चार सय ७३ एटीएम, एक सय दुईवटा विस्तारित काउन्टर एवं ८१ शाखारहित बैंकिङमार्फत बैंकिङ सेवा प्रदान गर्ने मुलुककै सबैभन्दा ठूलो शाखा सन्जाल भएको बैंक हुन पुगेको बैंकले जानकारी दिएको छ ।

देशको कुल जनसंख्यामध्ये २० वर्ष देखि ५० वर्ष उमेर समूहसम्मको आर्थिक रूपमा सक्रिय जनसंख्याको करिब २५ प्रतिशत जनतालाई बैंकमार्फत सेवा दिन बैंक सफल भएको छ ।

उत्तरदायी बैंकिङको अभ्यास गर्दै आएको बैंकले प्रत्यक्ष र अप्रत्यक्ष गरी गत आर्थिक वर्षमा करिब तीन अर्ब १६ करोडभन्दा बढी राजस्व नेपाल सरकारलाई भुक्तानी गरिसकेको छ । जुन मुलुकको वाणिज्य बैंकहरूमध्ये दोस्रो धेरै एवं समग्र देशको अन्य कम्पनीको तुलनामा छैटौं ठूलो योगदान छ ।

वित्तीय समावेशीकरणका लागि मुगु, कालीकोट, बझाङ, रूकुम, जुम्ला, सल्यानजस्ता बैंक तथा वित्तीय संस्थाहरूको उपस्थिति न्यून रहेका दुर्गम जिल्लाहरूमा तथा कुनै पनि बैंक तथा वित्तीय संस्थाहरू नपुगेको ३४ भन्दा बढी स्थानीय निकायमा शाखा विस्तार गरी सञ्चालन गर्दै आइरहेको छ । देशको कुल जनसंख्याको ८० प्रतिशतभन्दा बढी बसोबास गर्ने ग्रामीण तथा साना सहरी क्षेत्रमा बैंकले आफ्ना ७२ प्रतिशत शाखा कार्यालयहरू स्थापना गरेको जानकारी दिएको छ ।