कोभिड १९ – अनुगमन समिति गठन

ललितपुर । मानव अधिकारको अवस्था अनुगमनका लागि जिल्लास्तरीय ‘मानव अधिकार अवस्था अनुगमन’ समिति गठन भएको छ ।

राष्ट्रिय मानव अधिकार आयोगले कोभिड–१९ का सन्दर्भमा मानव अधिकारको व्यवस्था अनुगमनका लागि चार तहका समिति गठन गर्ने निर्र्णयानुसार आज सो समिति गठन गरेको हो ।
नेपाल बार एशोसिएसनका अध्यक्ष अर्जुन महर्जनको संयोजकत्वमा गठित तीन सदस्यीय समितिमा नेपाल पत्रकार महासङ्घका अध्यक्ष ज्ञानप्रसाद पौडेल र गैरसरकारी संस्था महासङ्घका अध्यक्ष टीकाराम दाहाल रहेका छन् ।

नेपाल पत्रकार महासङ्घका अध्यक्ष पौडेलले समितिले कोरोना भाइरसको जोखिम हुन नदिन जारी लकडाउन र जिल्लाका गतिविधि अध्ययन गरी मानव अधिकार आयोगलगायतका सम्बन्धित संस्थामा जानकारी गराउने निर्णय आजको बैठकमा भएको जानकारी दिए । उनले भने, “ बैठकले जिल्लामा कोभिड–१९ को जोखिम हुन नदिन बन्दाबन्दीको अवधिमा मानव अधिकारका समग्र क्षेत्रको निरन्तर अनुगमन गर्ने निर्णय गरेका छाँै । जिल्लामा नागरिकको उपचारका लागि जिल्ला अस्पताल अनुगमन, स्थानीय सरकारले गरेको तयारी क्वारेन्टाइन, आइसोलेस, एम्बुलेन्स सेवा, राहत वितरण, अति आवश्यक वस्तुको उपलब्धता, नागरिकका दैनिक आवश्यकतालगायतका विषयमा समेत अनुगमन गर्ने निर्णय भएको छ ।” कार्यविधिमा दुई सदस्य थप गर्नसक्ने व्यवस्थानुसार समितिले आवश्यकता परेमा पछि दुई सदस्य मनोनीत गर्ने निर्णयसमेत गरेको अध्यक्ष पौडेलले जानकारी दिए ।

यसका साथै आयोगले कोभिड–१९ का सन्दर्भमा अधिकार व्यवस्था अनुगमन नेटवर्कको कार्यविधि, २०७६ मा तोकेका अधिकार क्षेत्रभित्र रही अनुगमन, सहजीकरण र रिपोर्टिङ पनि गर्ने निर्णय गरेको छ ।