नाम टुंगो लगाएको खुसीयालीमा आज कोसी प्रदेशमा सार्वजनिक बिदा

काठमाडाैं । प्रदेश १ ले नाम टुंगो लगाएको खुसीयालीमा आज फागुन १८ गते सार्वजनिक बिदा दिइएको छ । बुधबार साँझ प्रदेशसभाले दुई तिहाई बहुमतका साथ प्रदेशको नाम कोसी राख्ने प्रस्ताव पास गरेको हो । सोही खुसीयालीमा सार्वजनिक बिदा दिने निर्णय गरिएको आन्तरिक मामिला तथा कानुन मन्त्रालयले जारी गरेको सूचनामा उल्लेख छ ।

बुधबार साँझ भएको मतदानमा कोसीको पक्षमा ८२ मत खसेको छ । सत्तारुढ नेकपा एमाले, माओवादी केन्द्र, र राप्रपा तथा प्रमुख प्रतिपक्षी नेपाली कांग्रेसका प्रदेशसभा सदस्यले कोसीको पक्षमा मतदान गरेका छन् ।

विपक्षमा जम्मा ४ मत परेको छ । एकीकृत समाजवादीका चार सदस्यले विपक्षमा मत हालेका हुन् । कोसीको विपक्षमा रहेकी जनता समाजवादी पार्टीका एक्ला प्रदेशसभा सदस्य एवं मन्त्री निर्मला लिम्बुले भने मतदान गर्न पाइनन् । मतदान प्रक्रिया सुरु हुने बेला बाहिर परेकी उनी प्रदेशसभाको ढोका बन्द हुँदा रोकिएकी हुन् ।