कसरी पाइनेछ एसईईको प्रमाणपत्र ?

काठमाडौँ । यस वर्षको माध्यमिक शिक्षा परीक्षा (एसईई) को प्रमाणपत्र आन्तरिक मुल्याङकनका आधारमा दिने भएको छ। शिक्षा ऐन २०२८ को दफा २० अनुसार बाधाअडकाउ फुकाउको व्यवस्थाअनुसार यस्तो निर्णय लिइएको हो । परीक्षा नलिने निर्णयसँगै सरकारले विद्यार्थी मूल्यांकनका सन्दर्भमा विभिन्न आदेश जारी गरेको छ।

जसअनुसार एसईईको फाराम भरेका विद्यार्थीको विद्यालयलद्वारा गरिएको अन्तिम मूल्यांकन विवरण सम्बन्धित विद्यालयले सम्बन्धित जिल्लाको जिल्ला शिक्षा विकास तथा समन्वय समितिमा पठाउनुपर्नेछ।

समितिले प्रमाणित गरी त्यो विवरण राष्ट्यि परीक्षा बोर्डमा पठाउनेछ। त्यसरी प्राप्त भएको विवरणका आधारमा बोर्डले परीक्षाफल तयार पारी प्रकाशन तयार गरी प्रमाणपत्र वितरण गर्ने आदेश जारी गरिएको सरकारका प्रवक्ता अर्थमन्त्री युवराज खतिवडाले जानकारी दिए।

यसका लागि बोर्डले आवश्यक कार्यविधि बनाउन सक्नेछ। यस आदेशलाई नेपाल राजपत्रको अतिरिक्तांमा प्रकाशन गरिने मन्त्री खतिवडाले बताए।

 

यस्तो छ शिक्षा ऐनको दफा २० मा

यस ऐनको उद्देश्य कार्यान्वित गर्न कुनै बाधा अड्काउ परेमा नेपाल सरकारले त्यस्तो बाधा अड्काउ हटाउन नेपाल राजपत्रमा सूचना प्रकाशित गरी आदेश निकाल्न सक्नेछ र त्यस्तो आदेश यसै ऐनमा परे सरह मानिनेछ ।